Kurti e ftoi të bashkëqeverisnin, reagon Lumir Abdixhiku: Do kthej përgjigje zyrtare

Kryetari i Lidhjes Demokratike të Kosovës, Lumir Abdixhiku, ka reaguar për herë të parë pas letrës që kryeministri Albin Kurti i dërgoi këtë të hënë, ku i propozoi një marrëveshje për bashkëqeverisje.

Në një prononcim të shkurtër për gazetarët, Abdixhiku, konfirmoi se ka pranuar letrën dhe se do ta shqyrtojë me kujdes përpara se të japë një përgjigje.

“Kam marrë një letër. Do të kthej përgjigje. Më lejoni të shkoj në zyrë ta shoh dhe pastaj do të jap një përgjigje me kohë”, u shpreh Abdixhiku para mediave.

Kreu i LDK-së bëri gjithashtu thirrje për maturi dhe qasje të përgjegjshme nga anëtarësia e partisë së tij në trajtimin e kësaj situate politike.

“I lus njerëzit tanë që gjendjen e tanishme ta trajtojmë pa arrogancë dhe të japim një përgjigje zyrtare, ashtu siç i takon një partie”, tha Abdixhiku.

Në letrën e tij, Albin Kurti është shprehur “i interesuar dhe i vullnetshëm për një marrëveshje politike me LDK-në”, duke theksuar se koalicionet ndodhin mes partive me dallime, kur vendoset për prioritetet e shtetit dhe qytetarëve.

Sipas tij, si votuesit e LDK-së ashtu edhe ata të LVV-së e shohin si opsion më të preferuar bashkëpunimin mes dy partive.

LEXONI GJITHASHTU:

• Kurti i dërgon letër Abdixhikut: Ftesë zyrtare për bashkëqeverisje me LDK-në
• Kriza politike, gazetari: Kosova mund të shkojë në zgjedhje të reja