Kurti e ftoi të bëhej pjesë e qeverisë, Abdixhiku njofton qëndrimin e LDK

Lidhja Demokratike e Kosovës ka refuzuar ftesën e kryeministrit në detyrë, Albin Kurti, për të hyrë në koalicion qeverisës me Lëvizjen Vetëvendosje. Në vend të kësaj, kreu i LDK-së, Lumir Abdixhiku, ka propozuar formimin e një qeverie tranzicionale, e cila do të funksionojë deri në zgjedhjen e presidentit të ri në vitin 2026.

Në një konferencë për media të martën, Abdixhiku theksoi se vendi ndodhet në krizë dhe se është e nevojshme të nisë një proces i ri politik për krijimin e një qeverie gjithëpërfshirëse, me emra unifikues dhe konsensualë.

“Në përputhje me këtë, LDK propozon nisjen e një procesi të ri politik. LDK propozon nisjen e këtij procesi konsultativ me të gjitha partitë politike shqiptare, me qëllim formimin e Qeverisë nacionale të tranzicionit. Një qeveri me afat të caktuar deri në zgjedhjen e presidentit të ri. Për këtë si kryetar i LDK-së jam i gatshëm të takohem me të gjitha partitë politike shqiptare, te ndihmoj në këtë proces dhe ftoj dhe zotin Kurti si dhe liderët e tjerë një takim të radhës kurdo që e shohin të arsyeshme”, tha Abdixhiku.

Ai bëri të ditur se ka kontaktuar të gjithë liderët e partive politike shqiptare për këtë iniciativë dhe se kryetari i AAK-së, Ramush Haradinaj, tashmë e ka pranuar këtë propozim.

“I kam njoftuar të gjithë liderët e partive politike shqiptare dhe më pas do të jetë çështje e partive ndaras se çfarë do të thonë. Zoti Haradinaj sapo më shkroi pas dhe pranoi një ide të tillë”, theksoi ai.

Abdixhiku, ka shprehur edhe gatishmërinë për zgjedhje të jashtëzakonshme nëse të gjitha partitë janë të gatshme.

“Jemi në krizë, kuptojeni këtë dhe partia e parë nuk ka zgjidhje për krizë, ka tendencë bllokuese, ne po ofrojmë dhe po shohim një rrugë të zgjidhjes drejt kësaj rruge. Zgjedhjet nuk përjashtohen, nëse janë të gatshëm dhe për zgjedhje, shkojmë edhe në zgjedhje”, tha Kurti.

Kryetari i Lëvizjes Vetëvendosje, Albin Kurti, i ka dërguar një letër, kryetarit të LDK-së, Lumir Abdixhiku, në të cilën thuhej se janë të interesuar për koalicion qeverisës.

Kurti në këtë letër e pranon se 61 vota përveç formimit të qeverisë, duhet t’i ketë edhe për zgjedhjen e kryetarit të Kuvendit.

“Si kryetar i LVV-së dhe kryeministër në detyrë i Republikës së Kosovës, jam i interesuar dhe i vullnetshëm për marrëveshje politike me LDK-në. Ne sigurisht që kemi dallime në bindje politike e në politikat qeverisëse, por koalicionet bëhen pikërisht ndërmjet atyre që kanë dallime, duke vendosur të drejtat dhe nevojat e shtetit dhe të qytetarëve si prioritet”, thuhet në letrën e Kurtit.

LEXONI GJITHASHTU:

• Kurti i dërgon letër Abdixhikut: Ftesë zyrtare për bashkëqeverisje me LDK-në
• Kriza politike, gazetari: Kosova mund të shkojë në zgjedhje të reja