Kurti: Kosova do të aplikojë në BE gjatë këtij muaji

Kryeministri i Kosovës, Albin Kurti priti në një takim këtë të enjte, ish-deputeten e Parlamentit Evropian nga radhët e CDU-së gjermane dhe ish-presidenten e Grave të EPP-së, Doris Pack.

Kurti e njoftoi Pack për prioritetet e Qeverisë, me theks investimet e huaja dhe planet për dorëzimin e aplikimit të Kosovës në Bashkimin Evropian gjatë këtij muaji.

Sipas një komunikate të qeverisë, kryeministri Kurti dhe Pack, diskutuan edhe për zhvillimet e fundit në vend, rajon dhe Evropë.

“Ata diskutuan edhe për situatën gjeopolitike pas agresionit të Federatës Ruse ndaj Ukrainës. Pack sot u nderua nga Kolegji AAB me çmimin Ndërkombëtar për Demokraci dhe Integrime. Duke e uruar atë për çmimin dhe falënderuar për kontributin e çmueshëm dhe të vazhdueshëm për popullin dhe vendin tonë, kryeministri Kurti tha se jeni gjithmonë të mirëseardhur në Kosovë. Në takim, Pack ishte e shoqëruar nga Behare Sahitaj, rektori i Kolegjit AAB, Bujar Demjaha dhe Prorektorja për Bashkëpunim, Venera Llunji”, thuhet në njoftim.

LEXONI GJITHASHTU

• Vuçiç bojkoton Samitin e BE: Askush nga Serbia nuk do të shkojë në Tiranë
• Rama: Më 6 dhjetor në Tiranë mbahet samiti i BE me Ballkanin Perëndimor
• Tabaku: S’kam pritshmëri nga samiti i BE-së për negociatat