Kurti: Kosova ende e rrezikuar nga kriminelët që duan të pasurohen me armë dhe luftë

Kryeministri i Kosovës, Albin Kurti, ka deklaruar në një intervistë për agjencinë italiane “AGI” të shtunën, se  Kosova vijon të jetë e kërcënuar nga ata që duan të pasurohen me luftë dhe armë.

Në fjalën e tij ai iu referua elementëve kriminalë dhe organizatave që ata drejtojnë në veri të Kosovës.

Kreu i qeverisë në Prishtinë tha se se ende ka porobleme në kufirin Kosovë-Serbi. Ai akuzoi kriminelët serbë dhe Listën Serbe për lidhje me Serbinë dhe Rusinë.

“Ata flasin për nacionalizëm dhe patriotizëm, por në realitet kanë ide fashiste dhe lidhje me Vuçiçin dhe Putinin”, ka shtuar ai.

“Ka ende probleme në kufirin me Serbinë. Fatkeqësisht ata që u pasuruan me luftën janë kthyer në kriminelë dhe vazhdojnë të pasurohen me bitcoin, drogë dhe armë. Ata e mbulojnë biznesin e tyre me ide nacionaliste, por janë ende kriminelë”, ka thënë Kurti, i cili është në Itali dhe po merr pjesë në kongresin e Parlamentit Evropian Socialist

Kurti ka deklaruar se po bëjnë çmos që t’i afrohen Bashkimit Evropian. Kosova e dorëzoi aplikacionin për anëtarësim në BE më 15 dhjetor të vitit 2022, pasi u njoh zyrtarisht nga Komisioni Evropian si shtet “kandidat potencial”.

Kryeministri i Kosovës ka folur edhe për marrëdhëniet me Italinë, duke thënë se ishte skeptik kur Giorgia Meloni u zgjodh kryeministre, por më pas tregoi se marrëdhëniet janë të shkëlqyera.

“Duhet të jem i sinqertë. Në të kaluarën e konsideroja Giorgia Melonin të lidhur me të kaluarën e saj të djathtë, me fashizmin. Që kur u bë kryeministre kam vënë re marrëdhëniet e saj të shkëlqyera me Bidenin dhe SHBA-në, mbështetjen e palëkundur për Ukrainën. Jo kështu për Salvinin që ka marrëdhënie me Putinin”, ka thënë Kurti.

LEXONI GJITHASHTU: 

• Samiti| Manjani: Dy ditë Tirana ka qenë në kolaps, bllokuan rrugët për asgjë
• PE: Mungesa e suksesit në dialogun Kosovë-Serbi e dëmton besueshmërinë e BE-së