Zyra e Kryeministrit e ka njoftuar Prokurorinë Speciale se shefi i ekzekutivit, Albin Kurti ndodhet në udhëtim jashtë vendit dhe nuk mund të paraqitet në Prokurorinë Speciale. Kështu ka bërë të ditur zëdhënësja e Prokurorisë Speciale, Liridona Kozmaqi.

Ajo ka shtuar se Prokuroria Speciale do të përgatis një ftesë tjetër për “një datë tjetër konform legjislacionit në fuqi”.

Kurti ishte ftuar në Prokurorinë Speciale të paraqitet sot në orën 09:30 në cilësinë e dëshmitarit.

Zëdhënësi i Qeverisë së Kosovës, Përparim Kryeziu kishte shkruar në rrjetin social Facebook se përmes kësaj ftese po tentohet ndikimi në rezultatin e zgjedhjeve të vitit 2025.

“Në zgjedhjet e kaluara kishte një vendim gjyqësor i cili ia kishte pamundësuar kandidimin në garën zgjedhore të 14 shkurtit 2021, kurse tash përmes kësaj ftese po tentohet ndikimi në rezultatin e zgjedhjeve të 2025. Qëllimi mbetet i njëjtë. Metoda ka ndryshuar. Kjo është ndërhyrje e sistemit të drejtësisë në proces zgjedhor”, kishte shkruar Kryeziu në rrjetin social Facebook./KosovaPress

LEXONI GJITHASHTU:

• Kurti thirret nga Prokuroria Speciale, Kusari-Lila: Ndërhyrje në procesin zgjedhor
• Vetëvendosja publikon listën zgjedhore, Albin Kurti renditet i pari