Kurti: Propozimi i BE-së për targat, i papranueshëm

Kryeministri i Kosovës, Albin Kurti, deklaroi sot se propozimi i Bashkimit Evropian për çështjen e targave ilegale serbe ka qenë i papranueshëm.

Sipas tij, propozimi i BE-së, që Kosova të mos fillojë me shqiptimin e gjobave, dhe që Serbia të mos lëshojë targa të reja për serbët e Kosovës, është i papranueshëm “nëse nuk shoqërohet me dakordimin që me urgjencë të angazhohemi për marrëveshje finale për normalizim të marrëdhënieve”.

“Në propozimin që na e kanë sjellë më herët zotërinjtë (kryediplomati i Bashkimit Evropian, Josep) Borrell dhe Lajçak për deklaratën e përbashkët, madje ka qenë edhe afati i marsit të vitit 2023. Pra, që ne po vijmë këtu në Bruksel për t’u marrë vesh drejt një ecjeje të re, për marrëveshje që arrihet para marsit të vitit 2023”.

Kurti ka thënë se Borrell “hoqi dorë nga ky afat” dhe nga “propozimi i BE-së për normalizimin e marrëdhënieve ndërmjet Kosovës dhe Serbisë”.

“Unë jam i gatshëm të zhvilloj takime gjithmonë me strukturën dhe rendin e njëjtë: marrëveshja finale me normalizim të plotë të marrëdhënieve, që ka njohjen reciproke në qendër, dhe çështjet aktuale të natyrave të ndryshme, si puna e këtyre targave. Mirëpo, nuk bën njëra pa tjetrën”, ka thënë Kurti.

Ai i ka bërë këto komente pas takimit që ka zhvilluar të hënën në Bruksel me presidentin e Serbisë, Aleksandar Vuçiç dhe ndërmjetësuesit e Bashkimit Evropian.

LEXONI GJITHASHTU:

• Borrell: Kurti dhe Vuçiç u pajtuan për një zgjidhje sot
• Vuçiç pas takimit me Kurtin: Absolutisht asnjë marrëveshje me Prishtinën