Kurti refuzon ofertën e Vuçiçit për shkëmbimin e qymyrit me energjie

Kryeministri i Kosovës, Albin Kurti ka refuzuar ofertën e presidentit serb, Aleksandër Vuçic për shkëmbin e qymyrit me energji elektrike. Kurti tha se kjo ofertë vjen në kuadër të dështimit të përpjekjeve për shkëmbim territori.

“Kjo është një përpjekje e presidentit autoritar të Serbisë që të kalojë nga projekti i dështuar i shkëmbimit të territoreve, në këtë të shkëmbimit të qymyrit. Pra në vend të territorit të Kosovës, po kërkon qymyr nga Kosova, por ai duhet që të njoh pavarësinë e Kosovës, t’i pranojë krimet e kryera gjatë luftës nga regjimi i Millosheviçit në Kosovë dhe duhet të distancohet nga presidenti despotik, Putin, përveçse nga Millosheviçi, ministër i të cilit ka qenë atëherë” , theksoi Kurti.

Kryeministri i Kosovës ka përsëritur qëndrimin e tij kundër iniciativës rajonale “Ballkani i Hapur”, duke thënë se nevojitet trajtim i barabartë për të 6 vendet.

“SHBA e kanë thënë shumë qartë se pa qenë gjashtë shtetet aty, nuk ka themelim të ashtuquajturit “Ballkan të Hapur”. Ballkani është i hapur ndaj Bashkimit Evropian, duhet të jetë plotësisht i hapur edhe ndaj NATO-s”, u shpreh ai.

Duke komentuar vizitë e nesërme të kancelarit gjerman, Olaf Scholz në Kosovë, Kurti tha se pret një fillim të ri dhe energjik të Procesit të Berlinit.

Nga Ohri, ku mori pjesë në Samitin e ‘Open Balkan’, Vuçiç tha se Beogradi ishte i gatshëm për një marrëveshje me Prishtinën për t’i ofruar energji elektrike në shkëmbim të qymyrit.

“Jemi të gatshëm për t’i ofrojmë Prishtinës energji elektrike në këmbim të qymyrit cilësor. Për ne nuk ka asnjë problem, jemi gati edhe të paguajmë me para”, tha presidenti serb.