Kurti takon krerët e partive, diskutime mbi situatën në veri

Kryeministri i Kosovës Albin Kurti e nisi ditën e martë duke pritur në zyrë liderët opozitar.

Ai i ftoi ata për të diskutuar rreth situatës së krijuar pas largimit të serbëve nga institucionet e Kosovës. 

I pari që doli nga ky takim, vetëm pak minuta pasi ai filloi ishte Ramush Haradinaj i Aleances për Ardhmërinë e Kosovës. 

Ai nuk foli për media, por dha sqarim në faqen e tij zyrtare në Facebook pse e la takimin. 

 “U detyrova ta lëshoj takimin sepse Kurti mbante ligjërata e nuk na sqaronte se përse ka prishur raportet me Amerikën. Për mua është e papranueshme që në raste kaq të ndjeshme, të prishim raportet me aleatin kryesor të sigurisë,” – shkroi Haradinaj.

Megjithatë, Kurti vijoi takimet me kreun e Partisë Demokratike e Kosovës, Memli Krasniqi dhe atë të Lidhjes Demokratike të Kosovës, Lumir Abdixhiku. 

Te dy pas takimit thanë se nuk dolën të sigurt nëse qeveria ka një plan për të zgjidhur situatën e krijuar në veri. 

Ata kërkuan që qeveria të ketë koordinim me aleatët si për situatën në veri ashtu edhe për procesin e dialogut, për të cilin theksuan se nuk morën ndonjë përgjigje të re. 

Opozita ofroi mbështetjen për tejkalimin e situatës në veri.

Në dalje Kurti nuk foli, por gjeti mundësinë që të reagonte ndaj qëndrimit të Haradinaj.

 “Nuk bëhet fjalë për kurrfarë prishje të raporteve me QUINT-in, BE, SHBA, NATO, KFOR. Ato janë të vazhdueshme, ndodhin nga disa herë në ditë, kështu që nuk është e vërtetë që ka kurrfarë cenimi të raporteve,” – shkroi ai.

LEXONI GJITHASHTU:

• Abdixhiku: Çdo situatë që krijohet pa koordinimin e aleatëve, përgjegjësi e Kurtit
• Memli Krasniqi: PDK mbështet Kurtin për vazhdimësinë e sovranitetit në veri