Kurti: Vizita e shefit të CIA-s, dëshmi e marrëdhënieve të forta midis dy shteteve

Kryeministri i Republikës së Kosovës, Albin Kurti, ka pritur sot në takim Drejtorin e CIA-s, William Burns.

Përmes një njoftimi të shpërndarë për mediat qeveria e Kosovës e vlerësoi si “moment të rëndësishëm historik” në raportet mes Kosovës dhe SHBA-së vizitën e shefit të CIA-s në Kosovë.

“Ajo është dëshmi e marrëdhënieve të forta dhe të qëndrueshme midis dy shteteve dhe është një mundësi e artë për të thelluar bashkëpunimin strategjik, për paqen dhe sigurinë në rajon dhe më gjerë”, u tha në njoftimin e ekzekutivit kosovar, të publikuar në rrjetet sociale.

Institucionet e sigurisë, inteligjencës dhe Qeveria e Kosovës u tha se janë të përkushtuara që të avancojnë bashkëpunimin me CIA-n.

“Kryeministri Kurti e falënderoi drejtorin e CIA-s për mbështetjen e vazhdueshme dhe shprehu përkushtimin për thellimin e bashkëpunimit në fushat me interes të përbashkët”, thuhen në njoftim.

Takimi mes Kurtit dhe Burnsit në Kosovë u zhvillua pasi kryeministri kosovar ishte në Shtetet e Bashkuara të Amerikës, ku me ftesë të Institutit Kombëtar Demokratik, ndoqi nga afër Kuvendin Kombëtar të Partisë Demokratike.