Kush e ka përgjegjësinë për shpërthimin në Lushnjë? Beqiri flet mbi hetimin

Eda Beqiri, përgjegjëse për sigurinë dhe shëndetin në punë, ishte e ftuar këtë të shtunë në emisionin “Review” në Euronews Albania, ku foli në lidhje me shpërthimin në Lushnjë ku ndërruan jetë dy persona dhe u plagosën 7 të tjerë. Beqiri tha se inspektoriati i punës po vijon hetimet për të gjetur problematikat që kanë ceduar dhe përgjegjësitë e atyre që duhet të garantonin sigurinë në punë të punëtorëve.

Ajo tha se në rastin e aksidenteve në punë, përgjegjësia bie mbi punëdhënësin, por nuk ndau të dhëna shtesë nga hetimet.

“Ne kemi që dje, por dhe sot që merremi me hetimin dhe verifikimin e kësaj ngjarjeje. Kjo është një ngjarje nën hetim dhe ne nuk mund të themi asnjë gjë dhe ende nuk kemi dalë në një konkluzion të saktë. Por po vijon puna për trajtimin dhe hetimin e kësaj ngjarjeje dhe të shihet se çfarë është zbatuar dhe nuk është zbatuar në drejtim të sigurisë dhe shëndetit në punë. Kush janë subjektet që janë përfshirë, kush janë punëmarrësit që janë aksidentuar në këtë ngjarje dhe pastaj do vijojmë me kontrollin legjislativ për të vendosur penalitetet dhe masat që duhet të marrim. Aksidentet në punë janë përgjegjësi e punëdhënsit dhe është një masë që nuk është marrë që e ka shkaktuar.

Qëllimi i hetimit nuk është sanksioni, por është trajtimi i ratit dhe mosndodhja më në të ardhmen”, tha Beqiri.

LEXONI GJITHASHTU:

• “Nuk ndërtohet poshtë shtyllave të tensionit”- Eksperti: Pse shpërtheu fabrika
• Avokati: Nuk pati kontakt me rrymën, pse ndodhi shpërthimi në Lushnjë
• Pamjet me dron tregojnë gjithçka nga shpërthimi në Lushnjë