Kush e organizoi vrasjen e Edmond Papës, lidhja me ekzekutimin makabër të Sadikajt

Operacioni i koduar ‘Eagle Eyes’ çoi në pranga organizatorin e vrasjes së Edmond Papës në zonën e Selitës 3 javë më parë.

Albano Velo 30 vjeç akuzohet si vëzhgues dhe organizatori i ngjarjes së rëndë dhe është arrestuar nga policia e Tiranës për vrasjen e 49-vjeçarit nga Fieri por me banim në Sarandë. Ai rezulton shok i Aleksandër Sadikajt, që u vra me eksploziv të telekomanduar 7 muaj më parë.

Policia ka shpallur në kërkim edhe një 44 vjeçar si bashkëpunëtor në vrasje, i cili dyshohet të ketë pasur rolin e ekzekutorit.

Hetuesit e krimeve të rënda kanë arritur të sekuestrojnë edhe automjetin tip “Audi” që autorët përdorën para dhe pas ngjarjes, pasi ata e kanë ndjekur për disa ditë viktimën deri në realizimin e vrasjes.

Për dokumentimin e ngjarjes hetuesit kanë administruar dhjetëra kamera sigurie ndërsa ngjarja dyshohet se ka lidhje me ekzekutimin makabër të Aleksandër Sadikaj me eksploziv në muajin qershor.

Viktima Edmond Papa rezultonte me precedentë në fushën e trafikut të drogës, ndërsa dyshohet se dy vrasjet lidhen pikërisht me përplasjen mes grupeve për motive hakmarrjeje.

Policia po verifikon edhe nëse vrasjet kanë lidhje me një ekzekutim të dyfishtë të dy shqiptarëve në Greqi pak ditë pasi në Tiranë u ekzekutua Edmond Papa.

LEXONI GJITHASHTU:

• Eksplozivi u vendos disa ditë më parë, detaje nga atentati për Sadikajn
• U vra brenda lokalit në Tiranë, ky është 49-vjeçari Edmond Papa (FOTO)