Aktualitet | Lajmi i fundit

Kush është shqiptari me dy emra që u ekzekutua në Athinë?

19 Gusht 2025 | 10:10

47-vjeçari shqiptar i vrarë mbrëmjen e së hënës nga persona të panjohur në zonën e Agios Panteleimonas të Athinës, ishte me origjinë nga Gjirokastra dhe ishte një person me precedentë të mëparshëm penalë. Mediat shqiptare raportojnë se vëllai i tij ishte një nga njerëzit më të afërt të një shqiptari që vrau një oficer policie në Tiranë, në vitin 2017.

Viktima, i njohur si Bashimi ose Artur Turabi, u qëllua për vdekje me plumb në kokë në rrugën Mihail Voda. Ai ishte i lindur në vitin 1978 dhe ishte arrestuar më parë në vitin 2022 për pjesëmarrje në një organizatë kriminale që kryente vjedhje ndaj pasagjerëve në mjetet e transportit publik.

47-vjeçari ishte vëllai i Marsel Bashimi-t, i njohur gjithashtu me emrat Marsel Shkurtaj dhe Marsel Gozhita, 38 vjeç, me një dosje të rëndë kriminale si në Shqipëri, ashtu edhe në Greqi.

Marsel Bashimi u arrestua në korrik të vitit 2022 bashkë me Bledar Jambelli dhe Kristaq Leci, për një incident me armë në Greqi. Dy të fundit janë të akuzuar në Shqipëri për vrasjen e oficerit të policisë Artan Cuku, përpara banesës së tij në Tiranë, në vitin 2017.

Sipas të njëjtit burim, e kaluara penale e vëllait të 47-vjeçarit përfshin:

Në Shqipëri:

Në nëntor të vitit 2014, u arrestua për një grabitje të dhunshme ndaj një vajze 20-vjeçare në Lazarat. E kërcënoi me thikë dhe i grabiti celularin ndërsa ajo po kthehej nga varrezat.

Në Greqi:

Më 14.06.2007, u arrestua nga policia kufitare në Filat për shkelje të ligjit 3386/05 “Për të huajt”.
Më 16.07.2009, u arrestua nga policia e krimeve ekonomike në Athinë, bashkë me nëntë persona të tjerë, për: vjedhje të fshehtë dhe grabitje në bashkëpunim, pjesëmarrje në organizatë kriminale, posedim të lëndëve narkotike me qëllim shpërndarjen dhe shkelje të ligjit për të huajt.
Më 26.08.2013, u arrestua në Trikala me qëllim dëbimin nga vendi, pasi u konsiderua i rrezikshëm për rendin publik dhe nuk kishte dokumente të ligjshme qëndrimi në Greqi.
Më 04.08.2019, Policia e Agios Panteleimonas ngriti dosje për falsifikim të dokumenteve të identitetit. Gjatë kontrollit, ai paraqiti një dokument me autenticitet të dyshimtë.
Më 11.08.2019, u akuzua për shkelje të ligjit për armët, pasi iu gjet në çantë një pistoletë dhe në xhep një thikë palosëse.
Më 27.08.2021, policia ngriti sërish dosje kundër tij për shkelje të ligjit për armët, pasi u kap duke hedhur një thikë palosëse në koshin e plehrave ndërsa dilte nga një ndërtesë në rrugën Mihail Voda.
Më 21.01.2022, u akuzua sërish për shkelje të ligjit për armët, pasi iu gjet një tjetër thikë.
Më 10.02.2022, Drejtoria e Sigurisë në Athinë ngriti kallëzim penal ndaj tij për tentativë vrasjeje me armë dhe dhunë ndaj punonjësve të drejtësisë. Pas një aksidenti dhe konflikti me një person, e goditi në këmbë me thikë dhe tentoi ta qëllonte edhe në qafë dhe gjoks, me qëllim ta vriste. Kur ndërhynë policët për ta arrestuar, ai u përpoq të largohej duke i sulmuar.
Më 11.02.2022, emri i tij u përfshi në dosjen e një organizate kriminale me 41 anëtarë –nga të cilët 30 u arrestuan. Kjo organizatë vepronte në grupe 2 deri në 6 persona dhe kryente vjedhje të përditshme portofolash dhe celularësh në stacionet e metrosë, autobusëve dhe trolejbusëve.