Kush janë të arrestuarit për skandalin e mikro-kredive, dalin emrat

Goditen institucionet e mikrokredive dhe përmbaruesit privatë që ngritën një skemë të mashtrimit dhe vjedhjes së mijëra qytetarëve. Hetimi i prokurorisë së Tiranës çon me masa sigurie arrest me burg dhe arrest në shtëpi 9 shtetas.

4 mijë kredi të këqija që u blenë nga një bankë e nivelit të dytë me vlerë totale rreth 7.2 milion euro, u përdorën për një skemë shtrënguese ku u imponohej debitorëve që kishin borxhe të vjetra, të rimerrnin kredi edhe pse nuk kishin mundësi shlyerje si dhe u bllokonin nga shoqëritë përmbarimore rrogat, pronat, apo makinat.

Hetimi i prokurorisë së Tiranës pas kallëzimit të ministrisë drejtësisë ka zbuluar se në këtë skemë ishin të përfshira 3 shoqëri përmbarimore dhe 2 institucione financiare të cilat e kanë vënë në jetë, përmes ndihmës së një noteri dhe të disa avokatëve.

Micro credit Albania dhe shoqëritë e tjera financiare joshnin debitorët të merrnin kredi të reja duke i hequr përkohësisht pasurinë e bllokuar ndërsa prokuroria thotë se më tej aplikoheshin kamat vonesa 2% + 8% për çdo vit.

Si një rast ilustrues të abuzimeve prokuroria thotë se për një detyrim të prapambetur prej 3.5 milion lekësh të vjetra një shtetasi i janë sekuestruar 14 pasuri.

Për administratorët e shoqërisë MCA dhe STAR-fs dhe përmbaruesit privatë,  Aldo Daka, Albert Gega, Edmond Mato, Kejda Seferi, Arben Meskuti, Alban Kote, Alketa Tanushi, Jorsida Dervishi dhe Elda Ibro të cilët akuzohen për vjedhje e shpërdorim detyre u caktuan masat e sigurisë arrest me burg dhe arrest shtëpie.

Për këtë çështje pak ditë më parë u thirr në seancë dëgjimore në komisionin parlamentar të ekonomisë dhe financave guvernatori i bankës së Shqipërisë Gent Sejko i cili deklaroi se institucioni që ai drejton kishte marrë të gjitha masat që i lejonte ligji.

LEXONI GJITHASHTU:

• Të miturit të përfshirë në krime, 613 të akuzuar për vjedhje dhe 4 për vrasje
• 16 mln dollarë, vjedhje më e madhe e floririt në historinë kanadeze, 6 të arrestuar