Lajçak mbyll vizitën me takimin me ambasadorët e akredituar në Kosovë

Përfaqësuesi special i Bashkimit Evropian për Ballkanin Perëndimor, Miroslav Lajçak, e ka mbyllur vizitën dyditore në Kosovë duke takuar të gjithë ambasadorët e akredituar në vend.

Lajçak deklaroi në një postim në orët e vona në Twitter se e kishte informuar komunitetin ndërkombëtar për hapat e ardhshëm dhe pritjet rreth dialogut mes Kosovës dhe Serbisë.

“E fundit, por jo më pak e rëndësishme, e informova komunitetin ndërkombëtar në Kosovë për gjendjen e dialogut, hapat e ardhshëm dhe pritjet tona për ditët dhe javët në vijim. Mirënjohës për interesimin dhe mbështetjen e tyre”, shkroi Lajçak.

Zyrtari i BE-së qëndroi për dy ditë në Kosovë një javë para takimit në Ohër ku pritshmëritë janë që të dakordohet mbi udhërrëfyesin e zbatimit të planit të Bashkimit Evropian për dialogun Kosovë-Serbi.

Përpos takimeve me krerët shtetërorë, Lajçak shkoi edhe tek partitë opozitarë të cilët kanë shprehur rezervat e tyre për planin e BE-së për normalizimin e marrëdhënieve mes dy vendeve.

Gjithashtu, Lajçak ka zhvilluar takime edhe me Listën Serbe dhe shefin e UNMIK-ut e të EULEX-it si dhe komandantin e KFOR-it.

LEXONI GJITHASHTU:

• Lajçak takon zv.kryeministrin Bislimi, ja për çfarë diskutuan
• Osmani takon Lajçak: Plani evropian të mos prekë sovranitetin e Kosovës