“Larg dhunës”- Mesazhi i Krishtlindjes nga Imzot Dodaj: Të falim më shumë dashuri

Në prag të Krishtlindjes, nga Katedralja e Shën Palit në Tiranë, Imzot Arjan Dodaj, Kryeipeshkëv i Kryedioqezës së Tiranë-Durrësit, përcolli një mesazh frymëzues për besimtarët dhe mbarë shoqërinë.

Imzot Dodaj ftoi besimtarët dhe mbarë shoqërinë që të falin më shumë dashuri dhe të reflektojnë mbi vlerat e shërbimit dhe kujdesit për njëri-tjetrin.

“Të falim dashuri dhe të vihemi në shërbim të njëri-tjetrit,” tha ai, duke theksuar vlerën e jetës dhe nevojën për një ndërgjegjësim të ri. “Zoti na viziton në çdo fëmijë që vjen në jetë, pasi asnjë fëmijë nuk është një gabim apo rastësi, por është një dhuratë. Sa nevojë ka vendi ynë sot për fëmijë dhe sa nevojë kanë fëmijët tanë për familje, edukatorë dhe politika pro jetës e familjes. Përndryshe, jemi të destinuar drejt shuarjes në shifrat alarmuese të zbrasjes demografike.”

Një apel i veçantë iu drejtua klasës politike, duke i ftuar politikanët të distancohen nga retorikat e dhunshme dhe të bëhen shembuj të denjë për rininë shqiptare. “Veçanërisht politikanët të mund të mësojnë politikë më të shëndetshme për të ndihmuar popullatën të disintoksikohet nga politika e konfliktit, dhunës dhe vulgaritetit. Fëmijët dhe të rinjtë ju vëzhgojnë dhe jo rrallë herë ju imitojnë,” tha ai.

Besimtarët e krishterë pritet të mblidhen mbrëmjen e 24 dhjetorit për meshën e shenjtë të Krishtlindjes, duke ndarë mes tyre urimet për më shumë paqe dhe dashuri mes njëri-tjetrit.

LEXONI GJITHASHTU:

• Në vigjilje të Krishtlindjes/ Imzot Massafra mesazh për besimtarët e krishterë
• Mitropoliti i Korçës, Imzot Joani, mesazh për Krishtlindjen