Lavrov për Samitin e NATO-s: Rusia është shpallur prej kohësh vend armik

Ministri i Jashtëm i Rusisë, Sergei Lavrov ka komentuar punimet e Samitit të NATO-s që po zhvillohet në Madrid.

Ai u shpreh se edhe para mbajtjes së këtij samiti, NATO-ja e ka shpallur kohë më parë Rusinë si vend armik, shkruan agjencia e lajmeve Tass.

“Sa i përket planeve që po përgatiten për samitin e NATO-s për të na shpallur një kërcënim, për të shpallur Kinën një sfidë sistematike, Rusia u shpall armik shumë kohë përpara se të mblidhej samiti i NATO-s”, tha kryediplomati rus.

Lavrov theksoi se shpallja e Rusisë si kërcënim nga ana e NATO-s, nuk është një befasi për Kremlinin dhe shtoi se kjo nuk do të sjellë asgjë të re për politikën e SHBA-ve dhe aleatëve të saj.

Sekretari i Përgjithshëm i NATO-s, Jens Stoltenberg ka njoftuar një ndryshim thelbësor në parandalimin dhe mbrojtjen e aleancës, duke forcuar mbrojtjen në kufijtë lindorë me më shumë se 300.000 trupa.

Aleanca përballet me sfida të shumta, nga lufta hibride, te destabilizimi i Ballkanit, sulmet kibernetike, dhe çfarë duhet bërë me fuqinë ushtarake në rritje të Kinës.

LEXONI GJITHASHTU

• 5 sfidat kryesore të Samitit të NATO-s në Madrid
• Aplikimi i Finlandës dhe Suedisë në NATO, përpjekje për të bindur Erdogan