LDK akuzon LVV për votat në ambasada, thotë se do ta mbrojë integritetin e votës

Lidhja Demokratike e Kosovës ka reaguar pas ankesës që Lëvizja Vetëvendosje dorëzoi në Panelin për Ankesa, për anulimin e votave me postë.

LVV thotë se ato vota janë keqpërdorur nga LDK. Ndërkohë, kjo e fundit thekson se Vetëvendosje kërkon anulimin e votave me postë të mërgatës për LDK-në, vetëm pse nuk u pëlqen rezultati.

“Kjo përpjekje për të cenuar vullnetin e lirë të votuesve tanë në mërgatë përbën një akt të rrezikshëm ndaj integritetit demokratik të procesit zgjedhor. Pikërisht përfaqësuesit politikë të kësaj partie, të emëruar nëpër ambasada dhe konsullata, janë ata që kanë ndërhyrë dhe manipuluar votat e diasporës në zyra e korridore. Mbi 1.600 fletëvotime të kësaj partie, të printuara me të njëjtat gabime teknike, dëshmojnë qartë një manipulim të organizuar. Për më tepër, ka prova të shumta mbi vetë-inkriminimin publik të aktivistëve të Vetëvendosjes në mbushjen masive të fletëvotimeve të mërgatës.

Nëse duhet të shqyrtohet anulimi i ndonjë vote për shkak të parregullsive, pikërisht këto raste duhet të jenë objekt i një hetimi të plotë dhe të paanshëm. Është paradoksale dhe thellësisht hipokrite që kjo kërkesë për anulimin e votave të mërgatës të vijë pikërisht nga Vetëvendosje, një subjekt politik që në zgjedhjet e vitit 2019 pati mbrojtur mbi 4.000 zarfe të ardhura nga “mërgata” serbe, duke kërkuar në Gjykatën Supreme që ato vota të pranoheshin si të rregullta. E njëjta parti sot kërkon anulimin e votave të diasporës shqiptare – natyrisht, vetëm atyre që janë në favor të LDK-së – dhe, njëkohësisht, synon të ndalojë kandidimin për deputet të Hysen Çekaj, djalit të heroit të kombit, Sali Çekaj”, thuhet në reagim.

Lidhja Demokratike e Kosovës theskon se do të përdorë të gjitha mjetet demokratike për të mbrojtur integritetin e votës së saj, brenda dhe jashtë vendit. Nuk do të lejojmë që vullneti politik dhe demokratik i mërgatës sonë të cenohet sa herë që rezultati zgjedhor nuk përputhet me interesat e Vetëvendosjes.

LEXONI GJITHASHTU:

• Abdixhiku merr besimin e vetëm 58 për qind të votuesve të LDK-së
• “Nuk bëjmë koalicion me Vetëvendosjen”, Hamza: PDK respekton vullnetin e qytetarëve