Legalizoi objektin me letra false, ngrihet akuzë për ish-drejtuesen e ASHK Sarandë

Aida Demi, ish-drejtoresha e ASHK Sarandë është vënë nën masën e sigurisë “detyrim paraqitje”, në lidhje me legalizimin e një objekti 4-katësh me dokumenta të falsifikuara.

Masa e sigurisë është dhënë nga Gjykata e Sarandës, pas përfundimit të hetimeve të prokurorisë në lidhje me ish-drejtoreshën e Kadastrës dhe dy vartësit saj, Ermen Stroka dhe Erald Lika.

Aida Demi akuzohet për “Shpërdorim detyre”, ndërkohë që nën masën e sigurisë “Arrest në shtëpi” është caktuar dhe ndaj personit që ka përfituar padrejtësisht nga procedura e legalizimit dhe që dyshohet se ka përdorur dokumenta të falsifikuara.

Hetimet kanë zbuluar se nga veprimet e kundraligjshme të specialistëve dhe ish-drejtoreshës së ASHK Sarandë, është tjetërsuar një truall me sipërfaqe 1000 m2 dhe godine katër kate me sip ndërtimi për banim 1359 m2 dhe me sip 1056 m2 aktivitet social ekonomik.

Kjo godinë disponohej dhe jepej me qira prej vitesh nga pronarët e vërtetë një subjekti të njohur tregtar në të gjithë teritorin e vendit i cili ushtronte aktivitet edhe në periudhën kur janë kryer procedurat e legalizimit.

“Pas hetimeve disa mujore Prokuroria pranë Gjykatës së Shkallës së Parë e Juridiksionit të Përgjithshëm Sarandë, ka mbyllur hetimet duke proceduar penalisht ish-drejtoreshen e ASHK-SË Sarandë, A.D., nën akuzë për veprën penale “Shpërdorim i detyrës” parashikuar nga neni 248 i Kodit Penal.

Për të njëjtën vepër penale akuzohen edhe dy ish-specialistet e ASHK Sarandë, E.S. dhe E. L., të cilët me veprimet e tyre të kundraligjshme kanë lejuar legalizimin e një objekti katër kate në favor të një shtetasi i cili ka përdorur dokumenta të falsifikuara.

Ndaj shtetasve më sipër, me vendimin nr 113, datë 13.5.2024, pas kërkesës së organit të akuzës, është caktuar nga Gjykata e Shkallës së Parë e Juridiksionit të Përgjithshëm Sarandë, masa e sigurise “arrest në shtëpi” ndërsa ndaj ish-drejtoreshes së ASHK Sarandë, për shkak të statusit të saj “nënë me fëmijë nën tre vjeç” është caktuar masa e sigurisë “detyrim për paraqitje” në policinë gjyqësore dhe “ndalim i daljes jashtë shtetit”.

Masa e sigurisë “arrest në shtëpi” është caktuar edhe ndaj shtetasit G. H., si personi që ka përfituar padrejtësisht nga procedura e legalizimit dhe që dyshohet se ka përdorur dokumenta të falsifikuara”, thuhet në njoftimin e prokurorisë Sarandë.

LEXONI GJITHASHTU:

• Ndërtoi pa leje hotelin 7-katësh, Apeli liron ish-drejtorin e ASHK Sarandë
• Shiste drogë në Sarandë, arrestohet në flagrancë 46-vjeçari nga Polonia