Von der Leyen dhe Charles Michel entuziastë pas telefonatës me Biden, paralajmërojnë ”fillim të ri” BE-SHBA

Liderët e Bashkimit Evropian, Ursula von der Leyen dhe Charles Michel lajmëruan për “një fillim të ri” të marrëdhënieve BE-SHBA të hënën gjatë bisedave telefonike me presidentin e zgjedhur në SHBA, Joe Biden.

Presidentja e Komisionit Evropian, Ursula Von der Leyen, tha se ajo e përgëzoi Biden për fitoren e tij gjatë telefonatës së tyre.

“Është një fillim i ri për partneritetin global BE-SHBA” shkroi ajo në Twitter, duke shtuar se një “BE e fortë dhe një SHBA e fortë që punojnë së bashku, mund të formojnë një axhendë globale bazuar në bashkëpunimin, multilateralizmin, solidaritetin dhe vlerat e përbashkëta”.

Nderkohë, edhe Charles Michel, presidenti i Këshillit Evropian, tha se ai ftoi presidentin e SHBA-së, të marrë pjesë së shpejti “në një takim të posaçëm në Bruksel vitin e ardhshëm” me krerët e shteteve të bllokut.

“Le të rindërtojmë një aleancë të fortë BE-SHBA,” shtoi ai.

“Tani është koha për të bashkuar forcat për ceshtje si COVID-19, klima, siguria dhe multilateralizmi.”

Në fillim të këtij muaji, presidenti i zgjedhur në SHBA, Biden foli me disa udhëheqës të BE-së.

Kancelarja gjermane dhe presidenti francez, thanë se kishin në plan të punonin për “përparësitë e përbashkëta” dhe “sfidat globale”, por duke përmendur edhe sfidën e ndryshimeve klimatike, me administratën e re të Joe Biden.

Një sondazh në Gjermani i cili u zhvillua në shtator dhe u publikuar të hënën, tregoi se 79% e qytetarëve gjermanë të anketuar, e vlerësuan marrëdhënien mes vendit të tyre dhe SHBA si “shumë të keqe” ose “mjaftueshëm e keqe”.

Pothuajse e njëjta përqindje e 1,058 njerëzve të anketuar “supozuan” se marrëdhëniet transatlantike do të normalizohen nën presidencën e Joe Biden.