Ligji i sigurimit të mjeteve, mazhoranca rrëzon dekretin e Metës: Na solli vetëm opinione

Aplikimi i sistemit bonus-malus në sigurimin e detyrueshëm të mjeteve është bërë objekt diskutimi mes Presidencës dhe mazhorancës në Komisionin e Ekonomisë.

Ky i fundit u mblodh për të shqyrtuar argumentet e Presidentit që rrëzoi projektligjin në ”Sigurimin e detyrueshëm në sektorin e transportit”.

Këshilltari ligjor i Metës, Bledar Dervishaj tha se sot për sot, pagesa e siguracionit sipas historikut të aksidenteve është i pazbatueshëm.

Por, për mazhorancën, ky argument i Presidentit konsiderohet si opinion dhe nuk ka bazë juridike për shkelje kushtetute.

“Në këtë argumentim të dekretit, nuk ka asnjë refernecë se cilin nen të Kushtetutës ka shkelur Komisioni i Ekonomisë gjatë shqyrtimet. Ka vetëm interpremtime”, u shpreh Anastas Angjeli, kryetar i Komisionit të Ekonomisë.

Pas këtij debati mjaftuan 10 vota kundër dekretit dhe 1 pro për ta kaluar draftin për miratim.

Ky projektligj, veç bonus-malusit synon të rregullojë edhe afatet për pagesat e dëmshpërblimeve nga aksidentet dhe të rrisë gjobat për shoqëritë e sigurimit që shkelin ligjin.