Lihet në fuqi pezullimi nga detyra për kreun e Prokurimeve Publike

Gjykata e Apelit e Posaçme ka lënë në fuqi masën e sigurisë ndaj kreut të Komisionit të Prokurimeve Publike, Jonaid Myzyri, duke e mbajtur të pezulluar nga detyra dhe nën masën “detyrim paraqitje”. Vendimi u dha nga gjyqtarja Igerta Hysi.

Hetimet ndaj Myzyrit lidhen me një tender të Autoritetit Rrugor Shqiptar për mirëmbajtjen me performancë të aksit rrugor Rrëshen – Shpal – Qafë Bene – Hadroj – Ura e Repsit, me numër reference REF-65268-07-13-2020 dhe fond limit 219.8 milion lekë (pa TVSH), i shpallur më 18 shtator 2020.

Sipas Prokurorisë së Posaçme (SPAK), Komisioni i Prokurimeve Publike, nën drejtimin e Myzyrit, dyshohet se ka favorizuar një bashkim operatorësh ekonomikë në mënyrë të qëllimshme, ndonëse këta të fundit kishin përdorur dokumentacion të falsifikuar. Sipas dosjes hetimore, komisioni ka shpërfillur vetëdijshëm paligjshmëritë në dokumentacion, duke cenuar rëndë parimet e barazisë në tendera dhe të konkurrencës së ndershme.

Përveç Myzyrit, janë marrë të pandehur edhe 10 zyrtarë të tjerë në lidhje me këtë çështje. Hetimet e SPAK vijojnë për të dokumentuar të gjitha hallkat e përfshira në procedurat që dyshohet se janë zhvilluar në kundërshtim me ligjin.

LEXONI GJITHASHTU:

• U mor i pandehur, kreu i Prokurimeve Publike paraqitet bashkë me avokatin në SPAK
• Kush janë zyrtarët që janë marrë nën hetim bashkë me kreun e Prokurimeve Publike