LIVE-Protesta e opozitës, Kryeministria në flakë, protestuesit hedhin molotovë drejt godinës

Tensione dhe përplasje u shënuan këtë të shtunë gjatë protestës së opozitës përpara Kryeministrisë dhe Kuvendit. Si pasojë e sulmeve me molotov dhe sende të forta, 11 punonjës të Policisë së Shtetit kanë mbetur të dëmtuar dhe po marrin ndihmë mjekësore.

Sipas burimeve zyrtare, protestuesit kanë hedhur mjete shpërthyese artizanale dhe objekte të forta në drejtim të forcave të rendit, duke shkaktuar lëndime dhe dëme materiale në perimetrin e sigurisë.

Ndërkohë, grupet hetimore kanë nisur dokumentimin ligjor të akteve të dhunës së ushtruar ndaj punonjësve të Policisë. Shërbimet policore bëjnë me dije se janë identifikuar personat e përfshirë në sulme dhe vijon puna për shoqërimin e tyre në ambientet e Policisë.

Situata u vu nën kontroll pas ndërhyrjes së forcave të rendit, ndërsa autoritetet paralajmërojnë se çdo akt dhune do të përballet me pasojat ligjore.

Protesta e opozitës këtë të shtunë vijon ende te Kuvendi me tensione, njëlloj si te Kryeministra.

Policia është mobilizuar pranë Kuvendit, ndërsa në disa rrugë janë fikur dritat për të menaxhuar situatën.

Makina për shpërndarjen e ujit ka shpërndarë protestuesit, duke treguar gatishmërinë e forcave për të kontrolluar turmën.

Pas përfundimit të protestës para Kryeministrisë, protestuesit iu drejtuan godinës së Parlamentit dhe u përplasën me policinë.

Ata tentuan të çajnë kordonin e policisë te Kuvendi, ndërsa policia i shpërndau me gaz lotsjellës. Protestuesit qëlluan me gurë drejt efektivëve të policisë përpara godinës së Parlamentit.

Në sheshin përpara Parlamentit, përplasjet mes protestuesve dhe policisë vazhduan në distancë. Pas disa minutash tensioni, protestuesit shpërndanë dhe hynë në oborrin e selisë së PD-së.

Këtë të shtunë, gjatë protestës të thirrur nga Partia Demokratike, u regjistruan tensione pas fjalimit të fundit të kreut të PD-së, Sali Berisha.

Disa protestues hodhën molotovë drejt Kryeministrisë dhe kordonit të policisë, duke krijuar situatë të tensionuar. Nga incidenti nuk raportohet për të lënduar.

Protestës kombëtare të 24 janarit, të thirrur nga Sali Berisha, i është bashkuar edhe Ervin Salianji. Ai shoqërohet nga disa demokratë, ndërsa në sy bie prezenca e Ilir Vrenozit nga Korça.

Partia Demokratike do të zhvillojë këtë të shtunë protestën e saj të dytë kombëtare përpara Kryeministrisë.

Pak minuta pas nisjes së aktivitetit, lideri i PD-së, Sali Berisha, mbërriti në ambientet e selisë së partisë. Nga aty, ai u nis së bashku me simpatizantët drejt Kryeministrisë, duke u bërë pjesë e tubimit masiv.

Protesta kombëtare e opozitës e kësaj të shtunë, do të shoqërohet me masa të shtuara sigurie nga Policia e Shtetit. Rreth 1600 efektivë policie po angazhohen për menaxhimin e tubimit, duke përfshirë jo vetëm forcat e Policisë së Tiranës, por edhe efektivë nga qytete të tjera të vendit. Masat e sigurisë përfshijnë vendosjen e një kordoni të dyfishtë para kryeministrisë, angazhimin e Forcave Kombëtare të Sigurisë dhe RENEA-s, si dhe pozicionimin e snajperistëve mbi godinat e kryeministrisë dhe Kryesisë së Kuvendit.

“Bëhet fjalë për 1600 efektivë policie që do të angazhohen në këtë protestë. Përveç forcave të Policisë së Tiranës, ka edhe forca nga qytete të tjera të vendit, të cilat janë në mbështetje gjatë gjithë ditës së sotme. Që prej orës 15:00 është bllokuar Bulevardi ‘Dëshmorët e Kombit’, po ashtu do të jenë të bllokuara rrugët ‘Papa Gjon Pali i Dytë’, ‘Ukraina e Lirë’ dhe ‘Ismail Qemali’, që janë akset kryesore që lidhin zonën me Kryeministrinë.Kjo protestë ka një shkresë nga PD dhe do të fillojë në orën 17:00, duke u mbyllur në orën 21:00. Punonjësit e policisë janë të pozicionuar pranë Kryeministrisë, ku janë vendosur në kordon para godinës, dhe të gatshme janë Forcat Kombëtare të Sigurisë dhe RENEA, të vendosura pas Kryeministrisë. Po ashtu, mbi godinat e Kryeministrisë dhe Kuvendit janë pozicionuar snajperistë, dyert e Kryeministrisë janë blinduar dhe pritet të shihen skenaret gjatë zhvillimit të protestës”, tha gazetarja.