Lufta frenoi turizmin, Shqipëria nuk u vizitua nga rusët e bjellorusët

Shqipëria mund të priste më shumë turistë vitin e kaluar, edhe pse shënoi arritje historike. Për operatorët turistikë lufta në Ukrainë i stepi banorët rusë dhe bjellorusë të vinë këtu, edhe pse e kishin rrugën e hapur.

Shqipëria priti 7.5 milionë vizitorë të huaj vitin e kaluar. Këto prurje tregojnë se vendi ka pritur më shumë turistë se asnjëherë më parë, dhe për operatorët turistikë ka dy arsye.

 “Faktori i parë ka qenë post-pandemia. Njerëzit filluan të lëvizin më shumë pas izolimit dhe faktori i dytë ishte transporti ajror, ku kompanitë low cost dyfishuan fluturimet nga Tirana,” – u shpreh Besnik Vathi, operator turistik.

Pjesa më e madhe e pushuesve ishin nga vendet fqinje Kosova, Maqedonia e Veriut e Italia, ndërsa hotelet vendase panë edhe një rritje të fortë të vizitorëve britanikë e spanjollë. Përgjatë verës, qeveria shqiptare lehtësoi vizat edhe për vendet pranë zonës së nxehtë të luftës në Ukrainë, Rusi e Bjellorusi, por vizitorët nga këto vende ishin të paktë.

 “Kjo rritje do të kishte qenë akoma më e madhe nëse nuk do të kishte ndikuar lufta në Ukrainë,” – tha Vathi.

Pasiguritë në lindje të Europës dhe inflacioni i lartë deri në 20% stepën qytetarët e Europës Lindore të vinin në Shqipëri, ndërsa operatorët e turizmit presin rritje të mëtejshme të pushuesve, e cila po negociohet edhe tek banorët aziatikë. 

 “Do të ketë rritje pasi Shqipëria po merr turistë gjithnjë e më shumë edhe nga zona të tjera nga lindja e mesme dhe Azia,” – tregoi Vathi.

Në raport me vitin 2021, vizitorët u rritën me 33%, vitin e kaluar.

LEXONI GJITHASHTU:

• Hong Kongu jep 500 mijë bileta falas, nisma për të rimëkëmbur turizmin pas pandemisë
• Vrau me armë gjahu kalin në agroturizëm, procedohet penalisht 24-vjeçari