“Lule dhe lotë”- Meshë për Kryepeshkopin Anastas Janullatos në Gjirokastër

Kortezhi me trupin e Kryepeshkopit Anastas Janullatos mbërriti mëngjesin e kësaj të marte në qytetin e Gjirokastrës, ku po mbahet një ceremoni e veçantë fetare në Katedralen e qytetit.

Trupi i Kryepeshkopit u prit nga qindra besimtarë ortodoksë, të cilët me lot në sy dhe lule në duar nderuan figurën e tij si udhëheqës shpirtëror i Kishës Ortodokse Autoqefale të Shqipërisë. Sipas amanetit të lënë prej tij, kortezhi ndaloi për disa momente në të gjitha stacionet e fshatrave kryesore të Bashkisë së Dropullit, ku banorët patën mundësinë të shprehinin respektin dhe nderimet e tyre.

Pas mbërritjes në Gjirokastër, trupi i Kryepeshkopit u vendos në Katedralen e qytetit, ku besimtarët kryen homazhe për t’i dhënë lamtumirën e fundit.

Pas homazheve në Gjirokastër, kortezhi do të vazhdojë rrugën drejt Tiranës, ku trupi i Kryepeshkopit do të vendoset në Katedralen “Ngjallja e Krishtit” për homazhe publike. Ceremonia e varrimit do të zhvillohet të enjten, me pjesëmarrjen e klerikëve, zyrtarëve dhe besimtarëve nga e gjithë Shqipëria dhe jashtë saj.

Kisha Ortodokse vijon të jetë në ditën e katërt të zisë kishtare nga pesë të tilla që u vendosën nga Sinodi i Shenjtë, në mbledhjen e jashtëzakonshme të zhvilluar të shtunën. Gjatë kësaj mbledhjeje, Sinodi caktoi Mitropolitin e Korçës, Joani, si kujdestar të fronit deri në zgjedhjen e pasuesit të Kryepeshkopit Anastas.

Kryepeshkopi Anastas ndërroi jetë në moshën 95-vjeçare më 19 janar, në spitalin “Ungjillëzimi” në Athinë, ku ishte shtruar që prej 3 janarit për shkak të gjendjes së tij të rënduar shëndetësore. Me një jetë të përkushtuar ndaj fesë, dialogut ndërfetar dhe shërbimit ndaj njerëzve, Anastas Janullatos la pas një trashëgimi të jashtëzakonshme, duke u bërë një simbol i shpresës dhe i paqes.

LEXONI GJITHASHTU:

• Trupi i Kryepeshkopit Anastas mbërrin në Shqipëri, besimtarët e presin në kufi
• Shqipëria mban meshat e përshpirtjes për Kryepeshkopin Anastas Janullatos