Presidenti francez Emmanuel Macron është kritikuar pasi hoqi një orë luksoze gjatë një interviste për ndryshimet e pensioneve.
Franca është përfshirë nga protesta dhe greva për vendimin e Macron për të rritur moshën e pensionit nga 62 në 64.
Përfaqësuesit e Macron thanë se presidenti hoqi orën sepse ajo “po trokiste mbi tavolinë”.
Por kritikët e tij kanë pohuar se ora tregon se ai është jashtë kontaktit me publikun, shkruan BBC.
Disa pretenduan se ajo vlente deri në 80.000 €, por Pallati Elysée tha se kjo nuk ishte e saktë.
Incidenti ndodhi gjatë një interviste të mërkurën, kur Macron po justifikonte arsyet e tij për rritjen e moshës së pensionit.
Teksa mbështeti parakrahët në tavolinë, u dëgjua një zhurmë.
Presidenti më pas vendosi duart nën tavolinë ndërsa vazhdonte të fliste. Kur i ngiti përsëri, ora ishte hequr.
Ekipi i tij këmbënguli se heqja ishte krejtësisht e pavetëdijshme. Por ora që mungonte tërhoqi shpejt vëmendjen e kritikëve të tij.
Clémence Guette, një deputet i partisë së majtë të opozitës La France Insoumise, ka marrë pjesë në protestat kundër reformës së pensioneve.
Ajo shkroi në Twitter se ndërsa presidenti po pretendonte se fituesit e pagës minimale kishin fuqi blerëse të paprecedentë, “imazhi përfundimtar” ishte ai “duke hequr orën e tij të bukur luksoze”.
“Presidenti i të pasurve nuk e ka veshur kurrë kaq mirë emrin e tij”, tha kolegia e saj, Farida Amrani.
LEXONI GJITHASHTU: