Macron thirrje RMV-së: Keni fuqinë për të ndryshuar rrjedhën e historisë

Presidenti francez Emanuel Macron i ka dërguar një mesazh Maqedonisë së Veriut për ta pranuar propozimin francez.

Macron ka shkruar se RMV-ja është në një moment kyç të historisë së saj kur 17 vite pas statusit kandidat, po hapet mundësia që të fillojnë bisedimet me BE-në.

“Përzgjedhja është e juaja. Ju popull maqedonas, që nga pavarësia keni treguar guxim të madh politik dhe mençuri. Në vitin 2001 keni nënshkruar Marrëveshjen e Ohrit, simbol i një suksesi në një shoqëri multietnike. 18 vite më pas arritët të gjeni forcë të nënshkruani Marrëveshjen e Presës, dhe u bërë anëtari i 30 i NATO-s. E merituat respektin e tërë Evropës. Dinjiteti i juaj si popull maqedonas asnjëherë nuk është vënë në pikëpyetje. Edhe njëherë ka ardhur koha të bëni zgjidhje ndërsa ne jemi në anën tuaj që t’ju inkurajojmë që të bëni hap të ri”, thuhet në letrën e Macronit.

Ai ka thënë se është i vetëdijshëm për ndjeshmërinë e çështjeve mes Maqedonisë së Veriut dhe Bullgarisë, por se dokumenti final ka adresuar çështjet kryesore të të dy palëve.

“Në Bullgari, draft marrëveshja ishte lëndë e debatit intensiv. Por në fund, Kuvendi bullgar diti ta marrë përgjegjësinë me votim të gjerë mbipartiak. Tani ju mbetet juve maqedonasve të deklaroheni. Fuqia për ta ndryshuar rrjedhën e historisë tani është e juaja. Nuk mund të them se kjo marrëveshje është perfekte por do t’ua pastrojë rrugën evropiane. Si çdo marrëveshje edhe kjo bazohet në kompromise dhe balancime. Kjo marrëveshje nuk e vë në pikëpyetje ekzistimin e gjuhës maqedonase që është pjesë përbërëse e identitetit tuaj”, thuhet mesa tjerash në mesazhin e Macronit.

LEXONI GJITHASHTU:

• Eurodeputetja ngre alarmin: Protestat në RMV mund të përdoren nga Rusia
• Partitë shqiptare kundër protestave në RMV: Mos nxisni konflikte ndëretnike