Macron: Nuk duam të fillojmë Luftën e Tretë Botërore, jam gati të flas me Putinin

Presidenti francez Emmanuel Macron tha sot se lufta duhet të përfundojë dhe se Ukraina duhet të jetë në pozicionin më të mirë të mundshëm për të filluar negociatat, duke shtuar se ishte “gati” të “fliste përsëri” me presidentin rus Vladimir Putin sapo të mbaronte lufta në Ukrainë.

“Ne nuk duam të fillojmë Luftën e Tretë Botërore. Një armëpushim është ajo që lejon situatën më të mirë humanitare dhe fillimin e bisedimeve që do të mundësojnë zgjidhjen e çështjeve territoriale”, theksoi udhëheqësi francez në një fjalim televiziv në “TF1”, raporton Le Monde.

Sipas tij, sanksionet e vendosura nga aleatët perëndimorë mund të zbatohen “brenda pak ditëve të ardhshme”.

“Nuk mund t’ju them nëse Vladimir Putin do ta vizitojë Turqinë. Po presim përgjigjen e Rusisë. Ajo që është në lojë në Ukrainë është siguria jonë. Ne duam një armëpushim në tokë, në det dhe në ajër për 30 ditë. Rusia dëshiron që armëpushimi të diskutohet në Turqi. Ne duam të zbatojmë sanksione kundër Rusisë në ditët në vijim, në marrëveshje me Shtetet e Bashkuara”, tha presidenti francez.

Ai theksoi se garancia e parë e sigurisë është një ushtri e fortë ukrainase.

“Për ta penguar Rusinë të kthehet në Ukrainë pas dy ose tre vitesh, ne do të vazhdojmë të investojmë. Në vitet e ardhshme, do të duhet të vazhdojmë të stërvitim, pajisim dhe mbështesim Ukrainën në mënyrë që ajo të ketë forcat e veta”, shtoi ai.

LEXONI GJITHASHTU:

• Macron akuza Putinit: Duhet të ndalojë së gënjyeri për luftën në Ukrainë
• Mbyllet takimi Macron-Rubio, në fokus të bisedimeve Ukraina