Maduro akuzon SHBA-në për nisjen e një fushate diskreditimi kundër Venezuelës

Shtetet e Bashkuara kanë nisur një fushatë për të diskredituar Venezuelën dhe po përdorin informacione të rreme për këtë, tha presidenti i Venezuelës, Nicolas Maduro.

Sipas tij, Amerika ka nisur një fushatë për të diskredituar Venezuelën dhe revolucionin e saj në një përpjekje për të justifikuar çdo veprim kundër vendit.

“Duke qenë të paaftë, thonë se Maduro zotëron armë të shkatërrimit në masë, armë biologjike, kimike ose se Venezuela po zhvillon armë bërthamore, Shtetet e Bashkuara përhapin informacione të rreme që askush, para së gjithash populli amerikan, nuk i beson”, tha Maduro.

“Venezuela është një vend paqësor dhe nuk ka kërcënuar kurrë askënd”, theksoi ai.

Ai kujtoi gjithashtu ndërhyrjen e CIA-s në punët e brendshme të vendeve të Amerikës Latine që rezultoi në përmbysjen e qeverive legjitime, si për shembull në Kili në vitin 1973.

Sipas Maduros, “uniteti kombëtar i politikës ushtarake” garanton pavarësinë dhe mbrojtjen e Venezuelës.

“Amerika jonë Latine, do të ndjekë rrugën e vet, e udhëhequr nga Venezuela, Aleanca Bolivariane për Popujt e Amerikës dhe revolucioni Bolivarian”, deklaroi ai.

Ndërkohë, Uashingtoni e akuzoi Karakasin se nuk po bënte mjaftueshëm për të luftuar kontrabandën e drogës. Me këtë ide, SHBA-të vendosën forca të mëdha në Karaibe. Tetë anije luftarake amerikane, një nëndetëse dhe më shumë se 16,000 trupa thuhet se janë vendosur nga Shtetet e Bashkuara në Karaibe.

Që nga shtatori, SHBA-të kanë shkatërruar të paktën 20 anije dhe kanë eliminuar 76 persona që dyshohet se janë përfshirë në trafikun e drogës nga Venezuela.

Sipas gazetës The New York Times, Presidenti i SHBA-së, Donald Trump, ka udhëzuar administratën e tij të ndalojë përpjekjet për të arritur një zgjidhje diplomatike të tensioneve me Venezuelën dhe ka autorizuar operacione të fshehta të CIA-s në atë vend.

LEXONI GJITHASHTU:

• Venezuela gati për luftë guerrile me SHBA, Maduro “kopjon” planin betejës në Vietnam
• Dërgimi i anijes luftarake në Karaibe, Maduro: SHBA po krijon luftë të re