Makinat ‘retro’ italiane, ekspozohen 30 automjete në qytetin e Gjirokastrës

Përgjatë rrugëve të kalldrëmta të Gjirokastrës është ekspozuar një koleksion i veçantë i makinave relike të ardhura nga Italia.

Grupi përbëhej nga 30 makina relike dhe udhëtonte në një itinerar nga Durrësi në Korfuz. Ndalesa e makinave RETRO në zonën historike të Gjirokastrës tërhoqi vëmendjen e turistëve të pranishëm duke qenë një tur interesant për ta.

“Është hera e parë që vij në Shqipëri për të bërë një tur me makinat relike. Kam përshtypje shumë të mirë nga Shqipëria, na kanë pritur mjaft mirë dhe jam shumë i kënaqur nga udhëtimi këtu ndërsa kam parë ndërtesa shumë interesante”, tha një turist italian.

“Është hera e parë që vij në Shqipëri,mund të them se do të kthehem sërish pas dy muajsh sepse më pëlqeu shumë. Kjo që kam është një makinë 30 vjeçare, prodhim anglez. 4 mijë kubik, mjaft e mirë dhe e veçantë”, tha një tjetër italian.

“Ky vend është i mrekullueshëm, Gjirokastra është e veçantë, nuk e njihnim më parë, makina që drejtoj ka qenë e babait tim, e vitit 1973, gjithmonë ka qenë pjesë e familjes”, tha një tjetër turist.

Ekspozimi i makinave relike u organizua si bashkëpunim me Shoqatën “Makina Historike dhe Motoçikleta në Ankona”.

Në këto ditë pranvere qyteti i gurtë po vizitohet nga një numër i konsiderueshëm turistësh vendas dhe të huaj.

LEXONI GJITHASHTU:

• Rikthehen makinat klasike, koleksioni “retro” pushton qendrën e kryeqytetit
• Ngjyra, histori dhe pasion, parada “Retro” në Shkodër ekspozon makinat e vjetra