Marrëveshja me Italinë për emigrantët, reagon Komisioni Europian

Komisioni Europian ende nuk ka një qëndrim për marrëveshjen e nënshkruar të hënën mes Italisë dhe Shqipërisë për krijimin e kampeve të refugjatëve.

Një zëdhënës i Komisionit Europian ka deklaruar për mediat italiane se ende nuk kanë një qëndrim për marrëveshjen.

Sipas zëdhënësit të KE, autoritete e  Brukselit janë në kontakt me palën italiane për të mësuar më shumë detaje për paktin e arritur mes dy shteteve. Zëdhënësi i KE shprehet se “para se të komentojmë më tej, duhet të kuptojmë se çfarë saktësisht synojmë të bëjmë’.

Zyrtarët e Komisionit Europian konfirmojnë se janë vënë në dijeni për marrëveshjen mes dy shteteve përpara se ajo të firmosej në Romë nga kryeministri Edi Rama dhe kryeministrja e Italisë, Xhorxhia Meloni.

Marrëveshja u njoftua ditën e hënë nga kryeministrja e Italisë gjatë konferencës për media me homologun shqiptar.

Gjatë fjalës së saj, Meloni tha se pakti i nënshkruar mes Shqipërisë dhe Italisë është një model bashkëpunimi që mund të përdoret edhe nga vendet e tjera të Bashkimit Europian, për t’u përballur me krizën e emigrantëve.

LEXONI GJITHASHTU:

• Marrëveshja për emigrantët me Italinë, BBC: Ku do të ngrihen strehimet
• Firmoset marrëveshja për emigrantët, Rama: Kur Italia thërret, Shqipëria përgjigjet