Marrëveshja për emigrantët, zv. kryeministri italian: Respekton ligjin e BE

Nga pranvera e vitit 2024, emigrantët e shpëtuar në Mesdhe nga anijet italiane do të transferohen në Shqipëri.

Zv. kryeministri dhe ministri i Jashtëm italian Antonio Tajani ka deklaruar se kjo marrëveshje e respekton ligjin e Bashkimit Europian duke hedhur poshtë pretendimet se menaxhimi i emigrantëve është i paligjshëm.

“Marrëveshja e nënshkruar me shtetin shqiptar është në përputhje me të gjitha ligjet e BE-së. Është shumë e ndryshme nga marrëveshjet e tjera që janë arritur nga vendet e tjera. Ajo sigurohet që personat që nuk kanë respektuar rregullat dhe nuk kanë të drejtë të hyjnë në Itali mund të kthehen në vendet e tyre të origjinës,” – u shpreh Tajani.

Komisioni Evropian ka thënë se ka kërkuar më shumë informacion në lidhje me detajet e marrëveshjes.

Të martën, kreu i Partisë Demokratike Elly Schlein tha se marrëveshja “duket në shkelje të hapur të ligjit ndërkombëtar dhe evropian”.

Seksioni italian i Amnesty International ka thënë se marrëveshja ishte “ilegale dhe e pavlefshme”.

“Njerëzit që shpëtohen në det nga autoritetet italiane, përfshirë ata që kërkojnë strehim në Evropë, janë nën juridiksionin italian dhe nuk mund të transferohen në një shtet tjetër përpara se të shqyrtohen kërkesat e tyre për azil dhe situatat individuale,” – deklaroi Amnesty.

LEXONI GJITHASHTU:

• Pjesë e bandave në Itali, kapet 28-vjeçari në kërkim ndërkombëtar (Emri)
• Marrëveshja për emigrantët me Italinë, organizohet protestë para Kryeministrisë