Marrëveshja SHBA-Iran, ministrja Ibrahimaj: Do të ndërpresim Bordin e Transparencës për karburantet

Ministrja e Ekonomisë dhe Inovacionit, Delina Ibrahimaj, pas mbledhjes së qeverisë këtë të premte bëri të ditur se qeveria vendosi të ndërpresë Bordin e Transparencës për karburantet.

Kjo ndërprerje, sipas saj, vjen nga marrëveshja e arritur mes SHBA-së dhe Iranit, e cila rezultoi edhe me hapjen e Ngushticës së Hormuzit.

“Do të ndërpresim bordin e transparencës, i cili prej disa muajsh është në funksion në bazë të ligjit për hidrokarburet.

Ka pasur luhatje të çmimit të karburanteve dhe, më shumë se dy javë, çmimi ka ardhur duke u reduktuar, ndërsa çmimet e bursës janë stabilizuar.

Është arritur një marrëveshje dhe kanali i Hormuzit do të zhbllokohet, dhe situata në Lindjen e Mesme ka më pak paqëndrueshmëri, dhe kjo është arsyeja që ne do ta përfundojmë funksionin e bordit të karburanteve”, u shpreh ajo.

E pyetur nga gazetarët nëse, pas heqjes së bordit, do të ketë një rritje të lartë të çmimeve të karburanteve nga kompanitë dhe çfarë masash ka marrë qeveria për këtë, Ibrahimaj u përgjigj se heqja e Bordit të Transparencës është një eksperiencë e kaluar nga rasti i luftës në Ukrainë dhe se kompanit, sipas saj, nuk i kanë rritur çmimet.

“Nuk është qeveria që bën këto lloj investigimesh, por është Autoriteti i Konkurrencës, i cili është institucion i pavarur dhe bën investigime nëse ekzistojnë apo jo kushtet për të pasur një treg ku lojtarët e tregut sillen si oligopol.

Kjo nuk është eksperiencë jonë e parë, e kemi bërë edhe kur nisi lufta në Ukrainë, nuk u materializua një sjellje e tillë. Në momentin që ne vendosëm të dalim nga bordi, kompanit nuk rritën çmimet në mënyrë të pakontrolluar. Patjetër që bordi i fuste në një regjim ku marzhet e fitimit ishin të përcaktuara dhe nuk mund të lëviznin në ato marzhe mbi çmimin”, u shpreh ajo.