Marrëveshja Shqipëri-Itali për emigrantët, Logu: GJK t’i drejtohet Strasburgut

Më 6 nëntor 2023, kryeministrja italiane Georgia Meloni dhe homologu i saj shqiptar njoftuan se kishin nënshkruar një marrëveshje për ngritjen e dy qendrave në Shqipëri për të mbajtur emigrantët, duke përfshirë njerëz që kërkojnë mbrojtje.

Ndërkohë së fundmi Amnesty International ka arritur në një konkluzion se marrëveshja ka shumë pak gjasa të arrijë qëllimin e saj të deklaruar në drejtim të menaxhimit të migracionit.

Sipas raportit, zbatimi i saj do të kishte një ndikim negativ në një sërë të drejtave të njeriut, duke përfshirë të drejtat për jetë dhe integritetin fizik të njerëzve në vështirësi në det, dhe të drejtat për liri, azil dhe mjete juridike adekuate të personave të transferuar në Shqipëri.

Në lidhje me këtë ka reaguar dhe këshilltari i Grupit Parlamentar Marash Logu, i cili në një postim që ka bërë në rrjetet sociale thotë se Amnesty International konfirmon shqetësimet e drejta të Grupit Parlamentar të PD-së lidhur me shkeljen e një sërë të drejtash dhe lirish themelore nga Protokolli Shqipëri – Itali.

“Analiza shteruese e organizatës prestigjioze Amnesty International konfirmon shqetësimet e drejta të Grupit Parlamentar të PD-së lidhur me shkeljen e një sërë të drejtash dhe lirish themelore nga Protokolli Shqipëri – Itali. Konkluzionet e ekspertëve të Amnesty International e bëjnë edhe më emergjente nevojën që Gjykata Kushtetuese t’i drejtohet Gjykatës së Strasburgut për një vlerësim tërësor të Protokollit në raport me të drejtat dhe liritë e garantuara nga Konventa Evropiane e të Drejtave të Njeriut”-shkruan ai.

LEXONI GJITHASHTU: 

• Komision për të kontrolluar SPAK? Shalsi: Tymnajë nga ata që i tremben drejtësisë
• VIDEO| Chelsea shënon 6 gola dhe shkon në finalen e Kupës, protagonist dhe Broja