Martesa e grave në Tiranë, Kisha Katolike: Personi që i kurorëzoi s’ka lidhje me ne

Konferenca Ipeshkvnore e Shqipërisë ka reaguar pas ceremonisë së martesës mes dy grave Alba Ahmetaj dhe Edlira Mara një ditë më parë në ambientet e bashkisë së Tiranës.

Përmes një njoftimi të shpërndarë për mediat, Kisha Katolike shprehet se :martesa mes personave të së njëjtës gjini është e papranueshme dhe kategorikisht e ndaluar”, ndërsa sqaron se personi që ka kurorëzuar këtë martesë nuk ka asnjë lidhje me kishën katolike.

“Sikurse jemi njoftuar nëpërmjet mediave, dje në ambientet e Bashkisë Tiranë, është zhvilluar një ceremoni në dukje “martesore” mes personave të së njëjtës gjini. Në lidhje me këtë gjë Kisha katolike në Shqipëri dëshiron të sqarojë të gjithë besimtarët dhe mbarë opinionin publik që: a) Bazuar në Doktrinën, Traditën dhe Magjisterin e Kishës, martesa mes personave të së njëjtës gjini është e papranueshme dhe kategorikisht e ndaluar. b) Lejimi dhe publikimi i ceremonive të tilla në institucionet shtetërore janë të papranueshme për sa kohë martesat mes të njëjtës gjini nuk janë të aprovuara me ligj në vendin tonë. c) Personi në foto edhe pse paraqitet nga ana e jashtme me veshjen e një kleriku katolik, nuk ka asnjë lidhje me Kishën katolike dhe nuk përfaqëson asgjë tonën”, thuhet në një deklaratë të Konferencës Ipeshkvnore e Shqipërisë.

LEXONI GJITHASHTU:

• A ka dalë martesa jashtë mode? Çfarë mendojnë qytetarët?
• Martesat e së njëjtës gjini/ Miratimi i kodit civil në Kosovë, opozita kundër Kurtit