Masakra “Panda”, eksperti i sigurisë: Vuçiç mund të merret si i pandehur

Presidenti serb Aleksandër Vuçiç mund të thirret si dëshmitar në lidhje me masakrën “Panda”, të ndodhur 25 vite më parë në një kafene në qytetin e Pejës, ku u vranë 5 gjimnazistë serbë.

I ftuar në Euronews Albania, eksperti i sigurisë Bedri Elezi, tha se ky zhvillim është një hap pozitiv, pasi dhe vetë serbët lokal po e kuptojnë se kanë në krye të shtetit një kriminel lufte.

Elezi theksoi se masakra dihet botërisht se u krye nga shërbimet sekrete serbe, për të akuzuar më pas UÇK-në, por tashmë sipas tij ka ardhur koha që të mbajnë përgjegjësi personat që e urdhëruan një krim të tillë.

Ai shtoi se nëse Vuçiç merret në cilësinë e dëshmitarit, nga hetimet shumë shpejt mund të kalojë dhe si i pandehur në këtë çështje pasi në kohën e ngjarjes ishte ministër i Informimit në qeverinë e atëhershme të “Bashkimit Kombëtar” të Mirko Marjanoviçit.

Në prononcimet e tij mediatike Vuçiç e ka rekomanduar veten si dëshmitar duke u mburrur në media për njohuritë e tij “tronditëse” për “Panda”.

“Në aspektin e dejtësisë ky është sinjali më i mirë i mundshëm që vjen nga Beogradi në lidhje me përgjegjësinë e këtij rasti shumë të rëndë. Ne e kemi ngritur shqetësimin se ky rast është bërë nga strukturat e sigurisë së Serbisë, por tani është kërkesa e vetë serbëve lokal për të vendosur presidentin serb përballë përgjegjësisë në të cilin duket se është implikuar. Ky rast ëshë një sinjal se vetë serbët lokal aty e kanë kuptuar se në krye të tyre është një kriminel lufte dhe e dinë që është i përfshirë në këtë çështje. Dëshmia e tij mund të shndërrohet në një pozitë ku vetë presidenti i Serbisë mund të jetë në krahun e të pandehurit dhe mund të akuzohet për pjesëmarrje ose mbështetje të operacionit “Panda”, ku u vranë të rinjtë serbë për të akuzuar më pas UÇK-në. Ajo që ka ndodhur dihet tani, por duhet të zbulohen personat përgjegjës”, tha  Elezi.

LEXONI GJITHASHTU:

• Masakra “Panda” në Pejë, familjarët e viktimave: Të dëshmojë Vuçiç
• Vjosa Osmani sot në selinë e NATO-s, takim “kokë më kokë” me Stoltenberg