Mbi 1400 të arrestuar në Turqi, vijojnë protestat pas arrestimit të Imamollu

Disa mijëra persona në Turqi mbushën rrugët për natën e shtatë të protestave që deri më tani kanë çuar në arrestimin e mbi 1.400 personave, përfshirë studentë, gazetarë dhe avokatë.

Trazirat në vend nisën të mërkurën e kaluar, kur kryebashkiaku i Stambollit, Ekrem Imamollu, i konsideruar si rivali politik kryesor i presidentit Erdogan, u arrestua nën akuzën e korrupsionit.

Grupet për të drejtat e njeriut dhe OKB-ja e kanë dënuar arrestimin dhe përdorimin e forcës nga policia ndaj protestuesve.

Imamollu thotë se akuzat e ngritura ndaj tij janë të motivuara politikisht, një pretendim ky i mohuar nga presidenti Erdoan.

Duke folur përpara një grupi të rinjsh ditën e martë, kreu i shtetit bëri thirrje për durim dhe mirëkuptim për kalimin e atyre që i quajti “ditë shumë të ndjeshme”.

Ai shtoi se personat që duan ta kthejnë Turqinë në një vend kaosi nuk kanë nga t’ia mbajnë dhe theksoi se protestat kanë hyrë në një rrugë pa krye.

Mbrëmjen e së martës, disa mijëra studentë nga shumë universitete të Stambollit u takuan në parkun Maçka, prej nga nisën marshimin.

Autoritetet në qytetin më të madh të Turqisë i kishin ndaluar me urdhër protestat dhe kishin mbyllur disa rrugë për të parandaluar akte provokuese nga manifestuesit.

LEXONI GJITHASHTU:

• Ekrem Imamoglu në burg, zgjidhet kryebashkiaku i përkohshëm i Stambollit
• Rusia godet me dronë qytetin-port të Mikolaivit, Zelensky: Moska nuk e do paqen