Regjistrohen mbi 2 mijë raste të reja me coronavirus në Shqipëri

Në Shqipëri janë regjistruar edhe 2,029 qytetarë të infektuar me coronavirus, ndërsa dy persona kanë humbur jetën nga kjo sëmundje në 24 orët e fundit.

Kjo shifër del pas testimit të 7,378 mostrave.

Në Shqipëri janë aktualisht 17,783 qytetarë të infektuar me COVID-19. Në spitalet COVID po marrin trajtim 130 pacientë, nga të cilët 20 janë në gjendje më të rënduar.

Masat anti-COVID në vendin tonë nuk do të ndryshojnë, edhe pse kjo javë ka shënuar pikun e infektimeve në 2 vjet pandemi.

Vendimi u mor nga Komiteti i Ekspertëve i mbledhur të enjten për të shqyrtuar situatën epidemiologjike në vend.

Kryetarja e Komitetit Teknik të Ekspertëve, Mira Rakacolli tha se niveli i masave mbrojtëse është në përputhje me zhvillimet epidemiologjike në vend, ndaj nuk do ketë ndryshme të kufizimeve anti-COVID.

Masat anti-COVID në fuqi në vendin tonë janë ora policore nga ora 23:00 e mbrëmjes deri në 06:00 të mëngjesit, përdorimi i detyruar i maskave në ambiente të mbyllura dhe lejimi i grumbullimeve jo më shumë se 50 persona.

Ministria e Shëndetësisë i bën apel qytetarëve të vaksinohen sa më parë, si edhe t’u përmbahen masave anti-COVID.

Çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqendruar. Vaksinimi është i hapur edhe për fëmijët +12 vjeç me probleme të sistemit imunitar, me rekomandim nga mjeku. MSHMS apelon qytetarët që kanë kaluar 6 muaj nga kryerja e dozës së dytë të vaksinës, të marrin dozën e tretë përforcuese.

Aktualisht bota po përballet me valën më të madhe të infektimit nga COVID-19, për shkak të përhapjes së variantit Omicron që ka transmetueshmëri shumë të artë si edhe të festave të fundvitit ku ka pasur grumbullime.

Statistika për datën 13 janar 2022:

Raste të reja ditore         2029

Të shëruar në 24 orë       751

Të shtruar në spitale       130

Humbje jete në 24 orë    2

Testime ditore                 7378

Shpërndarja gjeografike e rasteve aktive sipas qarqeve:

Tiranë            8779

Durrës             1434

Fier                 1387

Elbasan           1300

Vlorë                1065

Shkodër          1047

Gjirokastër     777

Berat               573

Lezhë              547

Korçë               502

Dibër                215

Kukës               157