Mbyllen hetimet për tenderin e Unazës së Madhe, SPAK çon në gjykatë 6 të pandehur

Prokuroria e Posaçme kundër Korrupsionit dhe Krimit të Organizuar ka përfunduar hetimet paraprake dhe ka paraqitur kërkesën  për gjykim në GJKKO, në lidhje me procedurën e prokurimit për segmentin rrugor “Mbikalimi Pallati me Shigjeta – Rrethrrotullimi Shqiponja”.

Sipas SPAK, procedura e prokurimit me fond limit mbi 2.25 miliardë lekë (pa TVSH) është zhvilluar në shkelje të rregullave ligjore, përmes një sërë veprimesh të koordinuara mes zyrtarëve përgjegjës. Prokuroria ka administruar dokumente tenderuese dhe teknike, informacione administrative, ofertat e dorëzuara, procedurat e ankimimit dhe vendimet e Komisionit të Prokurimit Publik, si dhe ka pyetur përfaqësues të subjekteve konkurruese dhe ankimuese në lidhje me procedurën.

SPAK bën të ditur se analiza e provave dhe dokumentacionit ka provuar se, gjatë zhvillimit të procedurës për tenderin e Unazës së Madhe, Loti 1, janë kryer shkelje që kanë dëmtuar interesat ligjore të shtetit.

Në përfundim të hetimeve, SPAK ka ngritur akuzë për veprën penale “Shkelje e barazisë së pjesëmarrësve në tendera apo ankande publike”, e kryer në bashkëpunim, parashikuar nga neni 258 dhe 25 i Kodit Penal (në versionin para ndryshimeve të ligjit Nr.43/2021), ndaj këtyre të pandehurve:

• Arbër Troka
• Miranda Shkurti
• Nikollaq Mihali
• Almir Hoxhaj
• Erjon Zemanaj
• Admir Pahumi

Çështja tashmë i kalon Gjykatës së Posaçme për vlerësim dhe gjykim në themel.

LEXONI GJITHASHTU:

• Deputeti i PS, Plarent Ndreca paraqitet në SPAK
• Sali Berisha nuk paraqitet në SPAK për shkak të gjendjes shëndetësore