Mbyllet bashkëpunimi me Sylvinho-n, braziliani nuk do të drejtojë më Kombëtaren

Të martën në orën 10:00 është paralajmëruar një konferencë urgjente në Federatën Shqiptare të Futbollit, ku sipas burimeve për Euronews pritet të zyrtarizohet mbyllja e bashkëpunimit me trajnerin Sylvinho.

Sipas të njëjtave burime, nuk është arritur marrëveshje për rinovimin e kontratës, e cila ishte parashikuar të përfundonte në qershor, dhe Sylvinho nuk do të jetë më trajner i Kombëtares së Shqipërisë.

Sylvinho iu bashkua Kombëtares shqiptare në vitin 2023 dhe në vitin e tij të parë arriti një sukses historik, duke siguruar kualifikimin në Kampionatin Evropian të vitit 2024 i cili u zhvillua në Gjermani.

Në kualifikueset e Botërorit 2026, Shqipëria u rendit e dyta pas Anglisë dhe arriti për herë të parë në fazën “play-off”, ku u eliminua nga Polonia në gjysmëfinale.