Mbyllja e degëve në universitete, studentët “homazhe” para ministrisë së Arsimit

Një grup studentësh janë mbledhur para Ministrisë së Arsimit për të protestuar për degët që po mbyllen në universitete.

“Gjatë 4 viteve të fundit janë larguar mesatarisht 8 studentë në ditë, ose rreth 3 mijë studentë në vit nga universitetet publike, të cilat po boshatisen çdo ditë e më shumë. Rënia e cilësisë së arsimit publik ka bërë që regjistrimet në to të ulen me 11.3%, kjo shifër vetëm në 3 vitet e fundit,” – u shpreh një student.

Sipas grupit që u mblodh për të protestuar, përgjegjësinë për këtë duhet ta mbajë Ministria e Arsimit e cila, siç shprehen studentët, po anashkalon këto problematika.

Sipas përfaqësuesve nga Qëndresa Qytetare, mbi 71% e programeve prioritare rrezikojnë që të mbyllen.

“Kjo panoramë tregon qartazi dështimin sistematik të politikave të ndërmarra nga MAS dhe është një sinjal që të rinjtë nuk i preferojnë këto programe, pasi ata nuk e gjejnë veten në tregun shqiptar të punës dhe nuk i besojnë këtyre politikave,” – shtoi studenti.

LEXONI GJITHASHTU:

• Bursa për studentët ekselentë, Kushi: Status i ri për universitetet
• Të shtëna me armë zjarri në një universitet në SHBA, 3 të vrarë