Veç universiteteve publike dhe private, institucionet e arsimit të lartë në Shqipëri do të kenë edhe një tjetër status: universitete publike të pavarura.

Ky ishte vendimi i bërë publik nga ministrja e Arsimit, Evis Kushi, pas mbledhjes së qeverisë, e cila shpjegoi se ky status i ri për institucionet e arsimit të lartë do t’u japë atyre më shumë fleksibilitet në menaxhimin e financave, por pa qëllime fitimprurëse.

“Me vendimin që morëm sot ne do të kemi edhe një formë të re, që janë institucionet e arsimit të lartë publik të pavarura. I jep më shumë fleksibilitet në aspektin financiar, do të jenë jofitimprurëse dhe të ardhurat do të përdoren për arsimin e lartë”, tha Kushi.

Kushi shpjegoi se statusin e ri mund ta gëzojnë jo vetëm institucione të reja, apo edhe ato ekzistuese.

Në fund, ministrja e Arsimit e mbylli me një thirrje për studentët, të cilët i ftoi të aplikojnë për një bursë që do të jetë e barazvlefshme me pagën minimale.

“Studentët që kanë mbaruar me të gjitha 10 shkollën e mesme dhe në matutë kanë marrë minimumi 9,5 në provime, ata që kanë arritur të marrin çmimet e para në olimpiada, ata që kanë zgjedhur të studiojnë në programet prioritare dhe e kanë mesataren minimumi 8,5”, sqaroi ministrja.

LEXONI GJITHASHTU:

• Gjyqi i Vokshit me ministren Kushi për tezat e provimeve, deputetja: Proces i stisur
• Debat në Komisionin e Edukimit, Kushi-Zhupës: E di mesataren tënde