“Me miell misri nuk bëhet bukë gruri”- Alliu: Shkëmbi dështoi dy herë para Tiranës

Ish-futbollisti Ilirjan Alliu ka shprehur kritika të forta ndaj trajnerit të ekipit të Tiranës, Bledi Shkëmbi, duke e cilësuar një zgjedhje të papërshtatshme për ekipin. Në analizën e tij, gjatë një interviste në “Max Sport”, Alliu përmendi performancën e dobët të Tiranës këtë sezon, ku ekipi ka vetëm një fitore në 12 javë dhe rrezikon të bjerë më poshtë në renditje pas ndeshjes së ardhshme midis Laçit dhe Bylisit.

Alliu vuri në pah se Tirana, si një “pasuri kombëtare,” ka një identitet dhe kulturë të veçantë që kërkon trajtues të përshtatshëm. Ai theksoi se, ndryshe nga Partizani, që tradicionalisht ka tërhequr lojtarë nga rajone të tjera të Shqipërisë, Tirana duhet të ruajë ADN-në e vet dhe karakterin e qytetit. Ai gjithashtu theksoi dështimet e mëparshme të Shkëmbit me ekipe të tjera, veçanërisht në aventurën e tij me Dinamon, e cila përfundoi me rënien e ekipit në një kategori më të ulët pavarësisht investimeve të mëdha.

Alliu përmbylli komentet e tij me një shprehje popullore: “Me miell misri, nuk bëhet bukë gruri,” duke nënkuptuar se aftësitë dhe stili i Shkëmbit nuk përputhen me kërkesat dhe traditat e klubit të Tiranës.

“Te Partizani shkon se kanë gjithë jetën që i marrin nga Korca, Tepelena, Përmeti. E pranon se kështu është ndërtuar Partizani në historikun e tij. Te Tirana ka humbur ADN, nuk këndohet me kënga tironse. Të flasim hapur, megjithë respektin për Bledi Shkëmbin si drejtues, si teknik, si futbollist, por unë do të isha menduar shumë gjatë për të. Ka dështuar me sukses në çdo aventurë të tij, dy dështime me sukses të tmerrshme dhe me shumë investime, sidomos te Dinamo që u projektua të fitonte Champions League dhe pastaj ra direkt në Kategorinë e Tretë pa ndaluar në të dytën fare. Por te Tirana kishin një shprehje me aq pak kohë sa isha unë aty: “Me miell misri, nuk bëhet bukë gruri”, tha Alliu.

LEXONI GJITHASHTU:

• Tirana pa spektatorë, Pogoni: Shkak-pasojë, lojtarët e Vllaznisë provokuan tifozët
• Tifozët e Tiranës flasin pas përjashtimit nga stadiumi: Vendim absurd, dashakeqës!