Më shumë besim tek institucionet

Rritet besimi i shqiptarëve tek institucionet në vend.

Këtë vit, qytetarët shqiptarë kanë më shumë besim tek institucionet në vend, krahasuar me një vit më parë. Barometri në Euroneës Albania i pyeti qytetarët lidhur me besimin që ata kanë ndaj institucioneve të ndryshme shqiptare apo të huaja që veprojnë brenda vendit dhe më pas i krahasoi rezultatet me ato të vitit 2021.

Rezultatet e anketës tregojnë se shqiptarët sot janë përgjithësisht me besimplotë ndaj institucioneve.

Besimi tek përfaqësuesit ndërkombëtarë është rritur ndjeshëm.

Sot më shumë se gjysma e shqiptarëve (52,6%) i besojnë Ambasadës Amerikane, të cilës në 2021-shin i besonin vetëm dy në pesë shqiptarë (40,3%). E njëjta rritje e ndjeshme në besueshmëri rezulton për delegacionin e bashkimit Europian (13.2 pikë përqindje) dhe komunitetin ndërkombëtar në përgjithësi (13.2 pikë përqindje).

Edhe pse me rritje më pak të ndjeshme, edhe vlerësimi për institucionet shtetërore është përmirësuar. Sot, shqiptarët i besojnë pak më shumë qeverisë (3,8 pikë përqindje), policisë (2,8 pikë përqindje).

Edhe besimi tek institucionet e reja të drejtësisë është në rritje për shqiptarët. Mes institucioneve ligjvënëse dhe ekzekutive në vend, rënien më të madhe në besueshmëri, krahasuar me një vit më parë, e ka pësuar opozita shqiptare dhe presidenti.

Ndërsa mes institucioneve të drejtësisë, gjykatat sot besohen më pak nga shqiptarët krahasuar me vitin 2021.

Gjetjet janë të anketës së Barometrit në Euronews Albania, kryer nga MRB dhe DataCentrum në nivel kombëtar me 1000 intervista ballë për ballë në familje, mes datave 23 maj – 4 qershor.