“Më shumë për të varfrit”- Papa: Vendet e zhvilluara të ndihmojnë ato të dobëta

Papa Françesku u mirëprit në Singapor nga presidenti dhe përfaqësues të qeverisë, në etapën finale të turit të tij në Azinë Jug-lindore dhe Oqeani.

Ai mbërriti në një nga vendet më të pasura në botë pas vizitës në një nga më të varfrit, Timorin Lindor.

Ai i shenjtë vlerësoi zhvillimin ekonomik të Singaporit duke e cilësuar një testament për njerëzimin, por i bëri thirrje vendit që të kujdeset edhe për të varfrit.

Papa apeloi gjithashtu për paga dhe kushte dinjitoze për punëtorët emigrantë, që ndihmuan në ndërtimin dhe kthimin e Singaporit në një fuqi financiare.

Në vijim të vizitës, ati i shenjtë do të mbajë edhe një fjalim drejtuar autoriteteve politike dhe do mbajë një meshë në “Stadiumin Kombëtar” të Singaporit, ku pritet të marrin pjesë 55 mijë persona.

Shteti i vogël aziatik është një ndër vendet me diversitetin më të madh fetar dhe Papa pritet të inkurajojë komunitetin e vogël por në rritje katolik.

Për shumë katolikë në Singapor, ky do të jetë takimi i parë me një Papë. I fundit që e vizitoi vendin e largët ishte Gjon Pali i Dytë në 1986-n.

Më herët, ati i shenjtë vizitoi Timorin Lindor, Indonezinë dhe Guinean e Re.

LEXONI GJITHASHTU:

• Papa kërkon që feja të mos përdoret për nxitje të konflikteve
• Papa Françesku: Demokracia nuk është në gjendje të mirë “shëndetësore”