“MEK aktivitet politik në Shqipëri”, Çuçi: Kanë thyer marrëveshjen me qeverinë

Ministri i Brendshëm, Bledi Çuçi në një konferencë për mediat e cilësoi të patolerueshme dhunë që anëtarët MEK kanë ushtruar ndaj policisë së shtetit gjatë operacionit të zhvilluar sot në kampin e tyre.

“Ndihem i keqardhur se Shqipëria u ka ofruar gjithçka që lidhet me strehimin e tyre për qëllim humanitar sipas marrëveshjes. Iu ka ofruar ndihmë, siguri, madje iu ka ofruar edhe mbrojtje ndaj kërcënimeve që vinin nga shërbimet sekrete të Iranit. Ata për më shumë se 3 mijë ditë kanë jetuar në siguri të plotë në garancinë tonë. E paimagjinueshme dhe e patolerueshme dhuna dhe reagimi që kanë bërë ndaj Policisë së Shtetit”, tha Çuçi.

Çuçi u shpreh se SPAK ka pasur indicie për aktivitetet politik nga ana e MEK në Shqipëri, që është në kundërshtim me marrëveshjen e strehimit të tyre humanitar në vendin tonë ndaj ka kërkuar në gjykatë një urdhër kontrolli që është zbatuar nga policia e shtetit.

“Aktiviteti i tyre politik kohët e fundit ka tërhequr vëmendjen e SPAK, që ka nisur disa çështje politike. SPAK ka pasur indicie dhe i është drejtuar gjykatës për të bërë një kontroll në kamp, që është një territor shqiptar, për të sekuestruar disa pajisje”, u shpreh ministri.

Policia e shtetit me urdhër të SPAK zhvilloi paraditen e së martës një operacion kontrolli në kampin e muxhahedinëve në Manzë.

LEXONI GJITHASHTU:

• Marrëveshjet për muxhahedinët dhe roli i amerikanëve, sa persona strehohen në MEK
• Tensionet në MEK, Gjokutaj: Ishte bastisje në kamp, do marrim hapa ligjor