Menaxhimi i Pallatit të Brigadave, Margariti: Nuk e përjashtojmë privatin

Në fletoren zyrtare u publikua dje plani i menaxhimit të integruar të Pallatit të Brigadave, që i hap rrugë bashkëpunimit mes Ministrisë së Kulturës dhe investitorëve strategjikë. Qëllimi është promovimi hapësirës si pikë turistike aksesi nga të gjithë qytetarët.

“Kemi hartuar një plan menaxhimi që shtron një kornizë të qartë të linjave guidë të mënyrave se si mund të zhvillohet Pallati, por mbi të gjitha se si mund të ruhet por edhe se si mund të kthejmë elementë të trashëgimisë kulturore, një element historik në një moment  të zhvillimit të qëndrueshëm ekonomik të zonës por edhe të komunitetit përreth”, tha ministrja e Kulturës.

Për ministren Pallati duhet të shërbejë si një muze në vetvete, dhe deri në këtë momente, nuk është bërë asnjë hap apo marrëveshje me një partnerë strategjik, ku Elva Margariti nuk përjashton as privatin.

“Nuk kemi asnjë avancim për sa i përket një kërkese reale ose një buxhet të parashtruar, por e kemi bërë sepse pa një plan të tillë çdo kërkesë që vjen në çdo moment do të ishte e pa mirëkornizuar. Patjetër që ka një hapësirë për një privat por kjo është pjesë e kërkesave që do të vijnë”, u shpreh Margariti.

Njësoj si me Butrintit, Ministria e Kulturës do të zbatojë zbatimin e planit të menaxhimit, që të mos lejojë tjetërsimin e hapësirës dhe ruajtjen e vlerave të saj, ndërsa pallati i brigadave, monument kulture i kategorisë së parë do të  mbetet pronësi e shtetit.

LEXONI GJITHASHTU:

• Investitor strategjik për Pallatin e Brigadave, kthehet në pikë turistike
• Marrëveshja për Butrintin, Meta: Kuvendi s’duhet të votojë symbyllur