Mersini përballë kandidatëve të PD: Pjesëmarrja e ulët erdhi nga mungesa e opozitës

Kryetarja e zgjedhur e Bashkisë Vlorë, Bruna Mersini, në një përballje me dy rivalët e saj ka diskutuar në “Now” për procesin zgjedhor që u zhvillua një ditë më parë, ku ajo siguroi fitoren në garën për drejtimin e bashkisë në emër të Partisë Socialiste.

Ajo theksoi se synimi i saj nuk ishin shifrat apo përqindjet, por fitimi i besimit të qytetarëve vlonjatë.

“Unë nuk kam hyrë në garë për shifra apo përqindje, por për të fituar një besim i cili u shpreh qartë në kutitë e votimit”, tha ajo.

Më tej, Mersini komentoi edhe mbi pjesëmarrjen e ulët në votime që sipas kryebashkiakes së Vlorës, erdhi nga mungesa e opozitës në garë.

“Në Vlorë ajo që i mungoi garës ishte pjesa e PD-së, shifrat folën. Nga ana tjetër, edhe moti me intensitet të lartë të shiut u bë një problem serioz në qytet prej 5-6 orësh, kohë në disfavorin tonë për moshat e treta apo qytetarët me probleme për të lëvizur për të votuar.

Mungesa e garës nuk krijoi ritmin e dinamikës gjithmonë të fushatës dhe ishte një fushatë prej gati 3 javësh. Nëse në bashkitë e tjera fushata ishte lançuar muaj përpara, në Vlorë kjo ishte një fushatë prej tre javësh”, tha Mersini.

LEXONI GJITHASHTU:

• “S’marr leksione demokracie nga ty, s’ke lidhje me PD”, Nika-Sota debat për Vlorën
• Arrestimi i Kevi Muçllarit në Pogradec, bashkëfshatarët protestë para komisariatit