Merz: S’i ushtrojmë dot presion sa duhet Putinit, jemi të varur nga ndihma amerikane

Kancelari gjerman Friedrich Mertz tha se Evropa po dështon të imponohet në skenën globale dhe se nuk ka aftësinë të ushtrojë presion mbi presidentin rus Vladimir Putin, dhe se është e varur nga ndihma amerikane.

“Ajo që më shqetëson, dhe duhet të pranoj se më rëndon, është se ne evropianët aktualisht nuk po marrim rolin në botë që duam dhe duhet të luajmë në mënyrë që të mbrojmë siç duhet interesat tona”, tha Mertz për CDU.TV.

Ai përmendi luftën në Ukrainë si një shembull të paaftësisë së Evropës për t’u pozicionuar në skenën globale, duke thënë se Evropa nuk ka asnjë levë për të ushtruar presion mbi Rusinë.

“Për momentin, nuk jemi në gjendje të ushtrojmë presion të mjaftueshëm mbi Putinin që ta përfundojë këtë luftë. Ne jemi të varur nga ndihma amerikane”, tha Mertz, siç raportoi sot Deutsche Welle.

Në takimin e “Koalicionit të Gatshëm”, Gjermania nuk premtoi një angazhim ushtarak ndaj Ukrainës nëse arrihet paqja midis Kievit dhe Moskës, tha Mertz, duke shtuar se ndërkohë vende si Kina, India dhe Brazili po thellojnë lidhjet me Rusinë.

Nga ana tjetër, Mertz përshëndeti shenjat e unitetit të ripërtërirë evropian, duke theksuar rolin e Gjermanisë në nxitjen e këtyre përpjekjeve.

“Berlini duhet të përmbushë përgjegjësinë e tij globale sepse kjo i sjell dobi dhe i intereson vetë Gjermanisë”, përfundoi Mertz.

LEXONI GJITHASHTU:

• Merz paralajmëron: Lufta në Ukrainë mund të zgjasë për muaj të tërë
• Merz: Ditë vendimtare për Ukrainën, duhet të ketë një armëpushim