Mes protestave dhe gazit lotsjellës, futet në komunën e Zveçanit kryetari i zgjedhur

Ilir Peçi kryetari i ri i zgjedhur për komunën e Zveçanit, ka arritur të futet brenda objektit mes protestave që kanë nisur prej disa orëve nga qytetarët serbë që jetojnë në këto komuna.

Policia e Kosovës përdori gaz lotsjellës dhe shok-bomba për t’i shpërndarë qytetarët e mbledhur para komunës në Zveçan, komunë me shumicë serbe në pjesën veriore të vendit.

Protesta po zhvillohet kundër kryetarëve të rinj të zgjedhur në komunat veriore: Zveçan, Leposaviq dhe Zubin Potok.

Udhëheqësit e këtyre komunave me shumicë serbe, u betuan një ditë më herët në ndërtesa publike, si shkollat, për shkaqe të sigurisë.

Ndonëse thanë se, së shpejti, do të nisin punën në komuna nuk ishte e qartë se kur do të ndërmerrej një hap i tillë.

Në të katër komunat me shumicë serbe në veri u dëgjuan fillimisht sirena alarmi, ndërkohë që para komunave Zubin Potok, Zveçan dhe Leposaviq u mblodhën edhe qytetarë.

Zgjedhjet lokale në veri të Kosovës u mbajtën më 23 prill, pas dorëheqjes së kryetarëve të komunave nga radhët e Listës Serbe, partisë më të madhe të serbëve të Kosovës. Kjo parti e kundërshtoi vendimin e Qeverisë së Kosovës për të kryer procesin e riregjistrimit të makinave me targa ilegale serbe.

Zgjedhjet u bojkotuan nga popullata shumicë serbe në atë zonë, e cila tani nuk i pranon rezultatet, përkatësisht kryetarët e rinj.

LEXONI GJITHASHTU: 

• Situata në veri të Kosovës/ Vuçiç urdhër për gatishmërinë ushtarake
• “U dhunuan drejtuesit e policisë dhe politika heshti”, Prençi: Opozita nuk denoncoi