Mes turizmit dhe betonit, ekspertët: Pogradeci duhet të bëjë kujdes me ndërtimet

Pogradeci po përjeton një rritje të qëndrueshme turistike, duke ruajtur njëkohësisht identitetin dhe karakterin e tij urban. Qyteti konsiderohet një nga shembujt e zhvillimit natyror, ku turizmi është rritur pa deformuar ndjeshëm strukturën ekzistuese.

Sipas urbanistit Saimir Kristo, një nga pikat më të forta të Pogradecit është rikthimi i turistëve nga viti në vit, të tërhequr nga eksperiencat e reja dhe aktivitetet që ofron qyteti.

“Ajo që e bën të veçantë Pogradecin dhe që nuk duhet humbur, është fakti që turistët rikthehen. Ata vijnë për eksperienca të reja, për aktivitetet dhe për atë që qyteti zbulon çdo vit. Por sfidë mbetet presioni i ndërtimeve private, sidomos në qendër, që mund të dëmtojë siluetën urbane dhe karakterin e qytetit.”-tha Saimir Kristo, urbanist

Rritja e turizmit ka sjellë edhe shqetësime për zhvillimin e pakontrolluar urban. Sipas ekspertëve, ndërtimet e reja duhet të balancohen me ruajtjen e identitetit dhe estetikës së qytetit.

Në këtë kuadër, pritet që një grup studentësh të arkitekturës dhe ekspertësh të zhvillojnë në Pogradec një seri laboratorësh studimorë për analizimin e territorit dhe hartimin e ideve të reja për zhvillimin urban.
“Do të vijmë me studentë dhe kolegë për të analizuar territorin në disa nivele dhe për të propozuar ide konkrete. Synimi është të energjizohet komuniteti dhe të ndihmohet bashkia me projekte për planifikimin hapësinor dhe rivitalizimin e trashëgimisë kulturore.”- tha Saimir Kristo, urbanist.

Kjo nismë synon të nxisë një debat më të gjerë mbi të ardhmen e qytetit, mes zhvillimit dhe ruajtjes së identitetit të tij.